Прашањето „Дали Синдикатот за образование наука и култура ќе го поддржи утрешниот Студентски марш“ остана неодговорено.
Откако студентите добија поддршка од многу од професорите, граѓанските асоцијации и некои политички партии, кои притоа нагласија дека „никако не смеат да се истакнуваат партиски обележја“, НОВА денеска побара одговор од СОНК.
Според неофицијални информации НОВА дозна дека во раководството постои поделеност за тоа дали на студентите треба да им се даде поддршка. Поголем број на членовите биле „за“ додека Претседателот се спротиставил. Според извори на НОВА одлуката требала да биде донесена денеска.
А фиксните телефони оставени за контакт на официјалната веб страна на СОНК денеска не одговорија иако нашата редакцијата неколку пати се обиде да стапи во контакт.
Во електронската порака која ја испративме на официјалната електронска адреса на СОНК пишува:
Почитувани,
Со оглед на закажаниот Студентски марш за утре, 10.декември, би сакале коментар од СОНК дали ги поддржува Студентски пленум и образложение за одговорот во зависност од тоа дали е позитивен или негативен.
Се надеваме на брз одговор, Со почит, Редакција НОВА ТВ
Репортер на НОВА денеска беше во просториите на Синдикатот но наидовме на затворени врати. Вратата на претседателот и секретарот беа затворени во просториите на СОНК.
Успеавме да разговаравме со две вработени кои ни рекоа дека Претседателот не е на работа и дека не им оставил никакво соопштение за медиуми. Тие не упатија кај неговата секретарка да прашаме, но и вратата на секретарката беше затворена.
Откако преку смс-порака стапивме во контакт со првиот човек на СОНК Јаким Неделков, тој ни напиша:
„На службен пат сум, ќе сторам напори до вечер да ви пратам мејл или на Вибер да се слушнеме околу 18 часот“.
Но иако беше побаран и преку алатката Вибер, почекавме на мејл, кој до моментов не пристигнал на електронската адреса на НОВА.
Останува нејасно зошто СОНК остана без официјален став за студентскиот марш кој е закажан за утре (среда) 10.декември, а останаа и прашањата дали можеби некој во СОНК се пожалил за притисоци во образованите институции.