Адвокатот Насер Рауфи, кој ги застапува обвинетите во случајот „Сопот“, по денешното рочиште во Кривичниот суд изјави дека доколку дозволи Судот, како сведоци на наредните рочишта ќе бидат повикани поранешниот шеф на УБК, Сашо Мијалков, и поранешната министерка за внатешни работи, Гордана Јанкуловска.
Овој случај го презеде Специјалното јавно обвинителство, бидејќи беше предмет на разговори во „бомбите“ што ги објави тогашната опозиција.
Судењето за случајот денеска по 14 години почна од почеток, поради смена на судечкиот совет. Шестмина од обвинетите повторно се изјаснија за невини. На четворица, пак, ќе им се суди во отсуство.
Првообвинетиот, 73-годишниот Сулејман Сулејмани, побара денеска од судот да заврши неговата голгота, затоа што, рече, 14 години му се суди за нешто што не го сторил.
-Не сум сторил ништо од ова судија, и ништо од ова за кое овде ми се суди не е вистина. Имам 73 години и 14 години ми се суди за дело кое не сум го сторил. Ова е премногу и јас само го молам господ за правда оти ова повеќе не се издржува, рече обвинетиот Сулејмани пред судот.
Сведокот Рамадан Бајрами и на денешното судско рочиште остана на исказот дека му била изнудена изјавата која помогна да се донесе осудителна пресуда за обвинетите во овој предмет. Бајрами тврдеше дека инспектори го малтретирале и долго го држеле во притвор се додека не ја потпише изјавата која му ја напишале.
Обвинителите на СЈО останаа на истото обвинение и на тоа пред судот да бидат изведени писмени докази и да се сослушаат сведоци.
Следното рочиште е закажано за втори март, кога исказ треба да дадат пет полициски службени лица.
На 4 март 2003, на локалниот пат Сопот-Сушево во местото викано „Божја дупка“ од подметната експлозивна направа загинаа двајца НАТО војници од полскиот контигент, како и Крунислав Кипријановски од Куманово. Од страна на Државното обвинителство беа обвинети 11 локални Албанци, а Основниот суд во Куманово истите ги прогласи за виновни и донесе осудителна пресуда.