Мојот сопруг нема ништо да го врати, но одговорност за неговата смрт мора да има. Вака ја започна својата приказна Едита Ибраим, сопруга на 38 годишниот Булент кој почина во четвртокот по рутинска операција на хемороиди. Таа за НОВА ја раскажа агонијата низ кој поминал нејзиниот сопруг од моментот кога бил опериран на 11 февруари се до моментот кога починал, три дена подоцна.
За лекарот Звонко Николовски кој го оперирал, Булент дознал од пријател бидејќи сакал да си го реши проблемот со хемироидите кои секојдневно му задавале мака. Операцијата ја договориле во неговата ординацијата ПЗУ „ Јанита“, а операцијата требало да се изведе во “ Др-сци мед. К. Митановски“во населбата Аеродром.
„ Кога влеговме таму имав чувство како да влегуваме во козметички салон. Таму не пречека валкана чекална и стара апаратура во малата операциона сала. Таму беше еден лекар во поодминати години и повозрасна медицинска сестра. Анестезиолог беше др. Снежана од болницата „8 Септември“. Во еден момент во себе посакав да се вратиме, но Булент веќе беше влезен внатре“, раскажува за НОВА, Едита сопруга на починатиот Булент Ибараим.
Веднаш штом по интервенцијата таа влегла да го види, а доктор Николовски и соопштил дека се поминало во ред. Едита вели дека тогаш докторот и побарал да плати, според договорот 750 евра. Таа му дала 46 000 денари но не добила фискална сметка ниту некаква белешка. Фискална сметка не добила ниту за прегледот од 2500 денари и 3500 денари кои му ги исплатила за брисевите кои ги земал.
„Добивме само еден Извештај напишан со пенкало, а на него, како што рече Николовски, заборавил да стави печат, како и розева рецепта за да си купиме лек од аптека“, вели Едита Ибраим.
Истиот ден, вечерта Булент добил дијареја и повраќање. Утредента повторно отишле на преглед, а лекарот рекол дека раната е во ред и препорачал топла када. Дури посочил дека има „спомен“ од интервенцијата со ласер и покажал изгореница на прстот на едната рака. Прегледот го платиле 1200 денари и повторно не добиле фискална сметка. Наредниот ден состојбата се влошила, Булент имал и силни болки.
„Николовски бараше матичниот лекар да му даде инфузија и инекција Кетонал, но откако матичниот лекар рече дека не може така, тој дојде вечерта. Сите денови имаше болки, а тој или му даваше Кетонал и Дијазепам или таблети Трамадол. Во среда вечерта, прстите на рацете му помодреа, беше ладен, се препотуваше. Во четвртокот утрото го однесовме во болницата „8 Септември“. Беше во многу тешка состојба. Со нас беше и доктор Николовски. Лекарите беа шокирани, не знаеја што му се случува, не можеа да му измерат притисок, да му земат крв. Неговите органи откажуваа“, раскажува неговата сопруга Едита.
Кога го ставиле на апарати за дишење во интензивна нега, повеќе не го виделе. Булент починал меѓу 18 и 19 часот.
Лекарот во болницата “8 Септември“ им соопштил дека Булент починал од сепса и дека треба да се направи обдукција, но родителите не дозволиле.
Како што веќе објави НОВА во саботата ДСЗИ ја затвори ординацијата по пластична и реконструктивна „ Др- сци мед. К. Митаноски „ лоцирана во општина Аеродром каде што лекарот Звонко Николовски ја извршил операцијата на починатиот, во изнајмена сала.
Николовски пак, за НОВА рече дека нема никаква вина и дека ги чека резултатите од анализите, по што ќе излезе јавно.
Булент зад себе остави сопруга и две деца, ќерка од 1 година и син на возраст од 5 години. Семејството очекува дека надлежните ќе го испитаат случајот и дека ќе има одговорност за неговата смрт, за на никој повеќе да не му се случи ова.