Ѓорѓи Дамјановски, сопруг на новонозначената главна уредничка во Канал 5, Маја Дамјановска, стана дел од одборот на директори на Акционерското друштво во стопроцентна сопственост на Владата Државната лотарија на Македонија.
Оваа одлука предложена од владата е донесена едногласно од членовите на Надзорниот одбор на друштвото којшто го бира новиот менаџмент, односно Управниот одбор. Седницата се одржала на 5 септември годинава. Од Управниот одмор на АД Државна лотарија на Македонија разрешени се претходните членови Владимир Бахчовановски, Благородна Дулиќ, Ивана Атанасовска, Надица Антоновска и Соња Цирковска.
Дамјановски до 2009 година воопшто не работи во овие дејности и според извори блиски до семејството, работел во еден скопски салон за продажба на автомобили. Токму ова е годината кога многу телевизиски куќи почнуваат агресивно да се престројуваат на страната на тогаш владејачката политичка партија ВМРО-ДПМНЕ. Причините за ова се многубројни, од спрегите со бизнисмените кои беа истовремено и сопственици на медиуми, до големите пари во вид на владини реклами поради кои претходната влада беше обвинувана за масовно корумирање и контролирање на медиумите со државни пари. Во 2009 нејзиниот сопруг почнува да работи како директор во две компании – ќерки во сопственост на Новоматик Групацијата која поседува десетици објекти за приредување игри на среќа во Македонија.
Дамјановска беше уредник и водител на вестите, нејзиното лице беше дел од мрежата препознатливи уредници и новинари кои ги поддржуваа политиките на минатата власт. Дамјановска имаше и своја емисија на Радио Слободна Македонија каде што свои емисии имаа и професорката Татјана Каракамишева, Миленко Неделковски и многу други новинари од тогаш провладините медиуми, но и експертите кои ги поддржуваа.
Непосредно пред смената на власта првото дадено интервју за Канал 5 на премиерот Зоран Заев беше токму кај Дамјановска. Таа потоа беше именувана за главен и одговорен уредник на местото на Лидија Богатинова.
Новите одбрани членови покрај Ѓорѓи Дамјановски се и Христо Најденов и Катица Николовска-Прнаркова. За Христо Најденов нема многу информации на интернет. Единственото име кое се јавува при пребарувањата е Христо Најденов во минатите години бил член на Управниот одбор во „Еурокомпозит 11 октромври“ од Прилеп, во време кога со него директорува Марјан Додовски.
Во записникот од седницата до којшто дојде НОВАТВ пишува „Христа“, така што НОВАТВ напоменува дека интерпретираше дека веројатно станува збор за печатна грешка. Во работните материјали за седницата не се предадени биографии на предложените кандидати, само имиња и презимиња. НОВАТВ веќе трет ден чека одговори од владата за нивните биографии и процедурите во кои се одбрани и предложени, но одговоорите се уште ги чекаме и покрај нашите чести потсетувања дека ни должат одговори.
Пребарувањата за Николовска-Прнаркова единствено укажуваат на вакво лице кое работи како овластен сметководител во сопсвено консалтинг биро во Гевгелија, популарно нарекувана Македонскиот Лас Вегас поради големата концентрација на казина.
Предлозите на истата седница се одобрени од трите члена на Надзорниот одбор Билјана Аврамовска – Ѓоревска и Фатмир Рамадановски како членови и Бојан Јанев како претседател на Надзорниот одбор на Државната лотарија.
Лиценци за коцка се делат ко шпил карти
Министерството за финансии од 2009 година наваму издаде стотици лиценци за работа на објекти кои приредуват игри на среќа, како обложувалници, казина и објекти со покер апарати. Овие процеси се одвиваа со брзорастечко темпо и од историјата на независноста Македонија не бележи толкав број на коцкарници и обложувалници. Иако министерството на својата веб страница редовно ги објавува компаниите кои добиле лиценци сосе образлложенијата за исполнетите улсови и одобрените програми, тие досега одбиваа јавно да објават правилницие кои ги идентификуваат техничките и другите услови, како и програмите на компаниите за спречување на перење пари, кои се потребни за да се добие ваква лиценца.
Граѓаните често реагираа дека бројот на вакви објекти во близина на училишта и градини и во станбените квартови e загрижувачки.