Здружението за надворешна и меѓународна политика „Совет на амбасадори“ денеска преку соопштение ја поздрави веста дека Европската комисија (ЕК) ја доставила предлог рамката за преговори со Република Северна Македонија до Советот на Европската Унија (ЕУ).
„Сметаме дека во време на искучително сложена пандемиска ситуација, прашањето за постапката за отпочнување на преговори на земјите од Западен Балкан и посебно за нашата земја е значајно за патот кон евроинтеграциите. Факт е дека од осамостојувањето па сé до денеска ние сме многу поблиску до добивање на датум за отпочнување на преговарачкиот процес. Склучените договори со Бугарија и со Грција се потврда дека кај нас во последните три години интензивно се работи на отворање на нова страница во меѓународните односи со што се унапредени меѓусоседските односи, еден од клучните Копенхашки критериуми“, наведуваат од Советот на амбасадори.
Советот на амбасадори, воедно, и во оваа прилика упатува благодарност до државните институции и лидери на Хрватска за вложените напори за поддршка на нашата земја при донесување на одлука за отворање на преговарачкиот процес со ЕУ за време на нејзиното претседавање со Унијата.
„Убедени сме дека од овој момент заеднички во земјата ќе работиме и ќе ги заокружиме бараните реформи во понатамошен од кон Унијата и конечно за време на претседавањето на Германија да се оддржи и првата меѓувладина конференција и на крајот Република Северна Македонија да добие и датум за започнување на преговорите. Советот е, исто така, убеден дека земјата ги има направено потребните подготовки за успешно завршување на преговорите во најдобар очекуван можен рок со што успешно ќе го заокружи целиот процес на интегрирање во ЕУ. За успешно финализирање на овој процес, Советот ги повикува граѓаните, политичките партии и идната влада безрезервно и со голема одговорност го дадат својот придонес во борбата против коронавирусот, а особено во предизборниот процес успешно да реализираме слободни, демократски и фер избори“, порачуваат од Советот на амбасадори.
Советот на Амбасадори изразува и жалење за, како што велат, некои политички партии кои во нивните предизборни спотови и на моменти со груб и навредлив политички жаргон се враќаат на веќе заборавени теми од минатото, наместо да нудат европски перспективи за граѓаните. Во тој контекст Советот смета дека ангажирањето на деца во политички настани е непримерен акт спротивен на меѓународните конвенции и како таков заслужува осуда, се наведува во соопштението.