Советот за култура при СДСМ го повикува градоначалникот на Центар, Андреј Жерновски, да го отвори процесот на ревизија на проектот Скопје 2014. Но предупредува таа да не се исцрпува само на финансискиот скандал.
„Да потсетиме дека Скопје не осамна на насловните страници на сите светски весници по финансискиот скандал туку како „престолнина на кичот“, односно дека срамот на нацијата и беше нанесен по многу други основи
Дека проектот, меѓу другото, е и финансиски скандал, не „перење“, туку „гнасење“ на тешко спечалените народни пари, потрошени на незаконски градежни работи, бездарнички скулптури и панаѓурски кич, како и со астрономски и со ништо заслужени хонорари и набавки на реквизити по цени на кои би им позавидел и емирот од Катар.
Штетноста на овој проект е што зад површинската појавност на една измамничка архитектонска и скулптурална претстава ги урива вредносните системи во културата, ги суспендира уставноста и правната држава, ја злоупотребува историја и ги поместува темелните камења на националниот идентитет“, се вели во соопштението на Советот.
Според Советот за култура при СДСМ „Скопје 2014“ не произлегува од подлабокото разбирање на културата и нацијата, ниту од професионалната уметничка или архитектонска мисла и практика. Тој проект е политичко-пропаганден манифест на партијата на власт, демонстрација на самовластие на еден човек кој ги донесува сите урбанистички, архитектонски и споменички одлуки. Ова самовластие се реализира низ инфраструктурата на државните органи, со јавни средства, а се изведува како вид културен инженеринг кој сака да го промени идентитетот на нацијата и граѓаните да ги држи во потчинетост со помош на еден помпезен и мегаломански (а всушност, брутално простачки) национализам.
Советот нагласува дека најголем проблем на „Скопје 2014“ е што е донесен и изведен на недемократски начин, со кршење, заобиколување и насилно преправање на законите.
„Очекуваме ревизијата на проектот покрај финансиската и правно-процедуралната да ја разоткрие и културната димензија на случајот и да го започне процесот на културна, историска, уметничка, урбанистичка и архитектонска евалуација на штетата направена со „Скопје 2014“ која ќе биде основа за идното обновување на градот Скопје и на македонското национално достоинство“, апелира Советот за култура при СДСМ.