По жестоката расправа на Советот на општина Центар која траеше повеќе од 5 часа, на вонредната седница на која се расправаше за новонастанатата состојба на „Паркинзи“-Центар и Град Скопје, Советот едногласно донесе три заклучоци, сите поднесени од Игор Алаџајков, член на Советот на о.Центар од редовите на СДСМ.
Според заклучоците, градоначалникот на Центар, Андреј Жерновски, ќе треба да бара од службите на град Скопје за времено решение на состојбата со паркиралиштата со кои стопанисува ЈП Паркинзи Центар, се до конечното завршување на постапката за добивање на Согласност, постапка која е во тек.
Во еден од заклучоците уште се вели дека Жерновски треба да спроведе во рок од 15 дена, контрола на документите кои се однесуваат на Паркиралишта Центар и да утврди дали е направен пропуст кога е формиран претпријатието Паркинзи Центар од претходнта власт.
Јавното претпријатие „Паркинзи“-Центар пак, ќе треба да изготви измени на Програмата за работа со детален финансиски план, а потоа да ги достави до Советот на Центар.
Во текот на седницата, расправата ја вжешти дуелот меѓу Андреј Жерновски и советничката на ВМРО-ДМНЕ, Даниела Рангелова околу бесплатниот паркинг. Рангелова тврдеше дека и ВМРО-ДПМНЕ имала идеја за бесплатен паркинг во Центар, Жерновски со програмата во рака тврдеше дека такво нешто не било ветено во предизборието.
Жерновски во еден момент ја покажа неговата изборна програма, во која стои ветувањето за бесплатен паркинг и изборната програма на ВМРО-ДПМНЕ, каде нема ветување за бесплатен паркинг.