Поради тешката финансиска состојба во која се наоѓа Охрид и масовното иселување на младите од градот, Дејан Пановски советник во Советот на Општина Охрид од ВМРО ДПМНЕ бара од локалните власти да иницираат одржување специјален Самит за Охрид. Според него неопходна е изработка и на стратегија за иднината на градот.
„Фактите дека години наназад Охрид има големи наследени долгови, блокади, тешка реализација на Буџетот, извештаите дека е во долг пред УЈП, дека е Општина со најголемо иселување и дека туризмот не носи очекуван економски бенефит покажуваат дека на Охрид итно му е потребна нова, поинаква стратешка рамка за иднината. Во таа насока како член на Советот имам предлог до највисоките органи на Општината да преземат иницијатива и лидерство, за одржување на еден вид специјален состанок или самит за Охрид за изработка на Стратегија за иднината“, вели Пановски.
Тој вели дека во целиот тој процес би се инволвирале значајни научни кадри од земјава и странство во најбитните области кои го засегаат Охрид.
„Ќе се користат искуства од збратимените градови ,ќе се повика експертиза од меѓународните пријатели , донатори и секако со учество на локалното население и интересенти. Едноставно мора да се утврди Стратегија каде го носиме Охрид во иднината и во економски и во социјален и во и во урбанистички и во демографска смисла,за да не го губиме Охрид пред очите“, додава Пановски.
За НОВА, Дејан Пановски вели дека ова е најдобронамерен предлог и оти градските власти мора да застанат зад неа.
„Затоа што мора да се застане единствено зад нова стратегија на Охрид. Проблемите се провлекуваат децении наназад не само од сега. Мислам дека би била добра една ваква иницијатива. Ова е предлог кој одамна тлее и еднаш таквата стратегија мора да се донесе. Напротив локалната со ваква иницијатива би покажала лидерство во интерес на градот“, вели Пановски.
Пановски втор мандат е во советот на Општина Охрид и во претходниот состав и сега остро се спротивставува на секое урбанистичко решение со кое се предвидува изградба на високо катници во Охрид. Вели дека она за што најмногу се борел во претходниот мандат како став опстојува и сега.
Охрид е градот од каде во моментот се иселуваат најмногу млади луѓе во Македонија. Според податоци на Државниот завод за статистика од Охрид на годишно ниво последните три години се иселуваат повеќе од 1000 луѓе, феномен кој треба да загрижува и тоа во најголем дел во странство.
Локалната власт и Градоначалникот на Охрид, Никола Бакрачески се уште се немаат изјаснето околу идејата на нивниот сопартиец.