Советот на јавни обвинители денеска донесе одлука да побара од Собранието да почне постапката за разрешување на Катица Јанева. Одлуката како што изјави претседтаелот на Советот е донесена едногласно.
Извештајот најверојатно ќе биде доставен до Собранието уште денеска, каде треба да го разгледа прво Комисијата за избори и именувања, а потоа за разрешувањето на Јанева треба да гласа и Собранието.
Што ќе се случи со предметите на СЈО доколку Јанева биде разрешена, а не биде избран в.д. шеф на СЈО, претседателот на Советот Штерјев рече дека „во моментов со тоа воопшто не се оптеретува“.
Според него, Советот на јавни обвинители има можност да избере в.д. обвинител, но дури откако Јанева ќе биде разрешена.
На новинарско прашање дали со разрешувањето на Јанева прекинува мандатот и на другите обвинители во СЈО, Штерјев го цитираше членот во Законот за СЈО во кој пишува дека „мандатот на обвинителите не можат да го надминат мандатот на Јавната обвинителка“.
Обвинителството за гонење организиран криминал и корупција ја осомничи Јанева дека ја злоупотребила службената положба и овластување и му овозможила на осомничениот Орце Камчев, во предметот „Империја“, да излезе од притвор и да добие времен пасош.