И покрај тоа што градоначалникот Ивица Коневски од ВМРО-ДПМНЕ денеска во изјава за НОВАТВ рече дека не верува во информациите дека ќе се градат бегалски кампови во општина Аеродром, денеска советниците од ВМРО-ДПМНЕ побараа итна расправа токму за овие лажни дојави.
Советниците од редовите на ВМРО-ДПМНЕ во општина Аеродром денеска попладнево на седницата побараа да итно и вонредно да се расправа за наводните бегалски кампови кои би се граделе на територијата на општина Аеродром. Оваа информација иако се потврди неточна, припадници на опозиционата партија ВМРО-ДПМНЕ се обвинувани дека намерно шират вакви лаги во пресрет на локалните избори, а Хелсиншкиот комитет обвини и за ширење ксенофобија.
Оваа партија формално не стои зад иницијативите за собирање потписи против бегалски кампови во Аердром, но НОВАТВ интервјуираше дел од припадниците на овие таканаречени граѓански иницијативи кои што самите кажуваа дека доаѓаат од ВМРО-ДПМНЕ.
На вакво собирање потписи вчера беше нападната и екипата на НОВАТВ.
Седницата е во тек. Од редовите на ВМРО-ДПМНЕ во Советот на Аеродром се познатиот хирург Виктор Камиловски, Сања Петровска – софтверски инжинер во Министерство за информатичко општество и администрација, Гена Стојановска- советник во Биро за судски вештачења, Ирена Блажевска- правник во министерството за финансии, Дејан Митевски-советник во министерството за транспорт и врски и други лица претежно вработени во јавната и државна администрација.