Американската скијачка Михаела Шифрин (21) ја одбрани светската титула во слалом. На првенството во швајцарски Сент Мориц таа забележа време од 1:37,27 минути што на крајот ѝ донесе четврто мундијалско одличје, трето во најтехничка дисциплина по шампионатите во Шладминг и во Бивер Крик во 2013 година, односно, 2015 година.
Сребрениот медал во Сент Мориц го понесе домашната натпреварувачка Венди Холденер која заостана 67 стотинки зад победничката, а бронзениот заврши на градите на Фрида Хансдотир од Шведска (+1,89 секунди).
Пласман до десеттото место остварија Петра Влхова (Словачка), Шарка Страхова (Чешка), Микаела Киргасер (Австрија), Ана Бучик (Словенија), Емили Викстрем (Шведска), Денис Фаербенд (Швајцарија), Бернадете Шилд (Австрија).
Светското скијачко првенство на швајцарските Алпи завршува во недела со слаломска трка во машка конкуренција.