Кандидатите за пратеници од Радовиш и Конче, денеска заедно со генералниот секретар на СДСМ, Оливер Спасовски, се сретнаа со граѓаните од радовишкиот регион, соопштува СДСМ.
-Во недела да се спротивставиме на диктатурата, на режимот, кој ни го остави тутунот дома и не остави без леб. Да не дозволиме да продолжат да не задолжуваат ниту денар повеќе, доволно сме осиромашени. И да ги потсетиме дека има разлика, ние градевме држава, а тие барок и бродови на суво, рече кандидатот за пратеник од Радовиш, Милева Ѓоргиева.
Во Конче имаме тежок економски и социјален живот. Живееме во време кога владата ветува економски бум, а таа создаде сиромашен народ, кој се мисли како ќе го преживее денот.
Затоа, нашата програма предвидува враќање на средната класа, инвестирање во иднината на младите. Време е да се стави крај на поделбите, со градење на фер и правично општество, рече кандидатот за пратеник од Конче, Благој Илиев.
Откако жителите од овој регион своите маки ги споделија со генералниот секретар на СДСМ Оливер Спасовски, тој им порача дека првиот чекор на СДСМ ќе биде искоренувањето на неправдите што власта на Груевски им ги направи на земјоделците.
Ќе ја субвенционираме нафтата за земјоделската механизација, со која земјоделецот ќе може лесно и навремено да ги извршува сите потребни агротехнички мерки на поле и постбербени операции. Поевтината “зелена нафта“ за земјоделците ќе биде посебна субвенција, чија висина ќе зависи од големината на површината во хектари, рече Спасовски.
Во недела гласаме за промени за нов почеток, гласаме за претседател кој што го немавме пет години. Запомнете, зад параванот сте сами и вие одлучувате, рече Спасовски, соопштува СДСМ.