Новиот министер за внатрешни работи, Оливер Спасовски, потврди дека личните карти доставени од новинарот на Фокус, доставени до МВР се фалсификат.
Министерството добило 105 примероци и од нив е утврдено дека на над 90 граѓани им е украден идентитетот.
Истрагата која ја води ЈО, посочи тој, треба да покаже кој ги фалсификувал исправите, за која цел, кој дала наредба и дали биле искористени во изборниот процес.
– Истрагата ја води Јавното обвинителство согласно законските прописи, не МВР. Во МВР беше пријавено дека постои индиција за фалсификување лични карти. Се работи на истрагата на наредбите кои ги дава јавниот обвинител. За сега првичното вештачење е завршено и е утврдено дека хартијата е фалсификат и дека од тие 105 примероци на 90 луѓе им е украден идентитетот. Се однесува на граѓани од Куманово, Кичево, Штип, Гостивар. Врз основа на наредбата на јавниот обвинител се вршат проверки во ДИК и во Заводот за статистика да видиме дали биле употребени и дали се користени за други цели. Најважно е да имаме квалитетна истрага која ќе даде одговор на прашањето кој ги фалсификувал, зошто, под чија наредба. Ние дознавме за аферата од проектот „Вистина за македонија“. Во неколку разговори се насочуваше дека се издаваат лични карти. Ова не е нешто ново што пред неколку дена сме го дознале – рече Спасовски одговарајќи на прашање од пратеникот од ВМРО-ДПМНЕ, Александар Николовски.
Николовски на овој одговор се пожали дека не му било одговорено кога Спасовски очекува да добие детали од истрагата кои ќе може да и ги соопшти на јавноста за да се тргнат секакви шпекулации за манипулации во изборниот процес.