Специјализантите по стоматологија се уште не ги добиле платите кои како надоместок на нивниот труд им ги вети министерот за здравство Венко Филипче. Финасиските средства им беше ветено дека ќе ги добиваат од октомври, сметано со платата од септември. Специјализантите велат дека постојано прашуваат во Министерството за здравство и во Министерството за финансии кое треба да ги одобри средствата, но велат дека тие постојано си ја префрлаат топката едни на други.
„Во Министерството за здравство ни кажаа дека документите се испратени на потпис во Министерството за финансии и дека работата ќе биде завршена бргу, за да можеме да ги потпишеме договорите. По последното јавување во Финасии, кој знае кое по ред, ни рекоа дека тие немаат добиено никаков документ од Министерството за здравство“, велат за НОВА, специјализантите по стоматологија.
Специјализантите по стоматологија потенцираат дека редовно ги исполнуваат работните обврски, а се уште немаат потпишано никаков договор.
„Изминаа 3 месеци, а ние сеуште не сме потпишале ниту договори, ниту пак сме ја примиле долгоочекуваната прва септемвриска плата, а денес е веќе е декември. Извесен период се обидуваме да дознаеме дали и каде постои пречка за наша исплата и одговорите кои ги добиваме се за нас нејасни и незадоволителни. Сметаме дека не сме субјект за манипулација, туку напротив треба да сме ценети согласно нашиот придонес. Очекуваме нашите заложби да добијат позитивна разрешница во најскоро време, бидејќи крајот на календарската година се ближи, а ние стравуваме дека може да бидеме изиграни“, велат специјализантите по стоматологија
Од Министерството за здравство за НОВА велат дека се предвидени финансиски средства за стоматолозите специјализанти и дека се чека на одобрување на Министерството за финансии.
„Фондот за здравствено осигурување на РМ има предвидено буџет за исплата на стоматолозите специјализанти и средствата се префрлени на Клиниката за стоматологија. Министерство за здравство даде согласност за вработување со договор на дело преку кои ќе се исплаќаат приватните специјализантите и истата е испратена преку ФЗОМ до Министерство за финансии. Во моментов се чека на одобрување во Министерството за финансии“, се вели во одговорот од Министерството за здравство.
Од таму потенцираат дека приватните специјализанти по стоматологија се предвидени и во буџетот за 2019 та година и ќе бидат исплаќани и следната година.
НОВА се обрати со прашања и до Министерството за финансии, но од таму веќе петти ден чекаме одговор. Специјализантите за утре најавија дека ќе излезат пред Стоматолошкиот факултет за повторно да укажат на нивниот проблем. Тие секојдневно ги извршуваат своите работни обврски со пациенти поради што бараат валоризација на нивниот труд.
Во средината на септември тие одржаа мирен протест пред Министерството за здравство по што министерот Филипче им вети дека ќе добиваат плата.