Полицијата во Србија, утрово спорведе голема акција против наркодилерите во земјата. Извршен е претрес на 909 локации во акцијата, а притворени се 118 луѓе, додека за 261 ќе бидат поднесени кривични пријави.
Освен дилери, на удар на акцијата во која учествуваа илјада полицајци, се најдоа и екстремисти и фудбалски хулигани, како и едно лице осомничено за убиство.
„Пронајдена е голема количина на сите видови дрога, а специфично е тоа што пронајдена е поголема количина на хероин од марихуана..важен е превентивниот дел, да и покажеме на јавноста кои се тие луѓе кои ги трујат нашите деца, го трујат овој народ“, вели Милорад Вељовиќ, директор на полиција.
Премиерот Ивица Дачиќ рече дека акцијата која во заедничка координација ја изведоа полицијата, обвинителството и Министерството за правда, ја оправдала својата цел.
„Ова покажува дека намерата на државата да се бори против криминалот и да воспостави една правна држава, е наш национален приоритет и тоа ќе продолжи и понатаму“, изјави Дачиќ.
Се очекува вкупно 242 лица да бидат процесуирани. Во акцијата откриена е и лабораторија, а запленето е оружје и муниција. Најголем „лов“ е остварен во Нови Сад, каде е пронајдено 5 килограми хероин.