-Додека производството на животинското месо во Србија опаѓа, увозот расте. Често во земјата пристигнува месо со сомнителен квалитет, предупредуваат од Земјоделската комора на Србија, ЗКС, додавајќи дека недоволната грижа на државата довела до тоа, јајца, месо и преработеното месо, Србија да ги увезува од Македонија и Босна и Херцеговина, а бидејќи тие две земји извезуваат повеќе одколку што можат да произведат, прашање е од каде всушност доаѓа местото кое го јадеме и зошто е толку поевтино од домашното, објавува денеска српскиот весник Блиц.
„Нашите производители поради скапиот процес на производство не се конкурентни. Затоа се намалува и производството на животинско месо во земјата, а кое за три години е преполовено и моментално изнесува околу сто тони годишно. Последица од тоа е се поголемиот увоз на пилешко месо и преработка”, вели Мирослав Благојевиќ од ЗКС, за Блиц.
Според него преработеното месо Србија го увезува од Македонија чие домашно производство не ги покривало ниту сопствените потреби.
Тој обвинува дека во Македонија месото се увезува од Бразил, каде живината се храни со генетски модифицирана соја.
Српските производители на месо велат дека не увезуваат месо за своето производство, но нагласуваат дека увозот на месо бил сериозен проблем за српскиот аграр.
„Македонците увезуваат месо од светот, но не би смееле да го извезуваат. Тоа никој не може да го контролира, а кај нас немаат увозна царина и месото е поевтино. Народот во криза, бира по цената“, вели Петар Матијевиќ, сопственик на месната индустрија “Матијевиќ.”