Македонскиот министер за надворешни работи,Никола Димитров, се сретна со неговиот српски колега Ивица Дачиќ, денеска во Ниш.
Дачиќ по средбата изјави дека состанокот бил добар, конструктивен и прецизираше дека безбедносните сознанија до кои дошла Србија не се однесуваат на македонската влада, туку на безбедносен сектор.
– Секако, сето тоа со учество на странски фактор. Можам да ви кажам кој е тој странски фактор, но нема. Овде станува збор тоа да престане да се случува, да не бидеме колатерална штета на меѓународните односи – рече Дачиќ.
Додаде дека комуникацијата меѓу двете држави ќе продолжи и натаму и истакна дека премиерот на Република Македонија Зоран Заев е поканет да го посети Белград.
Според него тоа ќе биде посета која ќе ги надгради односите на доверба, особено со претседателот на Република Србија Александар Вучиќ, и дека двете министерства за надворешни работи ќе се однесуваат и ќе соработуваат во контекст на овие односи.
Најави дека повторно ќе остварат средба во рамки на Бледскиот форум што ќе се одржи на 4 и 5 септември оваа година.
– Разговаравме за причините за овие да речеме релативно турбулентни неколку дена во нашите билатерални односи. Мислам дека областа на разузнавањето е деликатна и колку повеќе шпекулираме во јавноста, толку поголема белја создаваме. Меѓутоа, две поенти би сакал да истакнам. Прво, допрва треба да се види и да се работи на разјаснување на тие информации и второ, се радувам што тие информации доколку излезе дека се такви какви што се, доколку се точни, се радувам што не ја инволвираат македонската Влада. На некој начин оваа епизода покажува колку е важно да сме блиски, колку е важно да имаме дијалог, чист и отворен – рече Димитров.
Потенцира дека суштината на новата македонска надворешна политика е Македонија и регионот да оди напред и нашите соседи да бидат успешни.
На прашањето за српскиот разузнавач Горан Живаљевиќ, кој беше во Собранието вечерта на 27 април, Дачиќ рече дека таа тема е завршена и дека е договорено тоа споразумно да го решат двете служби.
– Сакам да кажам дека вие во Македонија добро знаете декапретставници на многу други служби се вмешаа во разни случувања. Србија се нема мешано, нити ќе го правиме тоа. Не сакаме Србија да биде обвинувана за предизвикување нестабилност во Македонија – рече Дачиќ.