Производителот „Здравје Радово“ ветил дека ќе го повлече спорното сирење „Кришка“од српскиот пазар, ова во изјава НОВА го потврди Горан Паповиќ, претседател на Организацијата на потрошувачи на Србија.
Утрината, вели Паповиќ, во последниот разговор со компанијата било договорено да се повлече сирењето од маркетите на чија декларација пишувало дека содржи полномасно млеко и јогурт.
Независните анализи кои организацијата ги направила во референтна лабораторија во Франција покажале дури 77 проценти присуство на рибино, палмино, кокосово и билно масло во сирењето.
-Непримерно е две години да се продава такво сирење бидејќи тоа е измама на потрошовачите, изјави за НОВА Паповиќ.
Анализите на ова и на уште 200 други млечни производи биле направени уште во јануари. Но, бидејќи производителот не сакал да го повлече сирењето од пазарот, организацијата била приморана јавно да укаже на проблемот и информацијата ја објавиле на нивната веб страна.
Организацијата пред неколку дена ги предупреди потрошувачите да го одбегнуваат ова сирење додека не биде повлечено од маркетите. Од “Здравје Радово”, пак, тврдат дека никогаш не ги довеле во заблуда своите потрошувачи и дека гарантираат за безбедноста и квалитетот на своите производи .
-Ова се само напади кои ги имало и секогаш ќе ги има, коментираа од компанијата.
Од Агенцијата за храна и ветеринарство вчера за НОВА се изјаснија дека не знаат за што станува збор. Подоцна во изјава за медиумите директорот Дејан Рунтевски нагласи дека сите млечни производи на нашиот пазар се безбедни.
Инаку, Србија сеуште е на нозе по аферата со канцерогениот афлатоксин М1 кој беше пронајден во млекото и млечните производи. Таму сеуште пристигнуваат резулати од анализите кои се прават во странство.
Паповиќ смета дека со строга контрола за еден месец работите ќе се нормализираат и потрошувачите ќе бида сигурни во безбедноста на млечните производи.
-Да бидам искрен сите домашни и странски измамници се сконцентрирани на нашиот пазар. Затоа мора да бидеме многу внимателни, вели Паповиќ.
Под притисок на потрошувачите Србија ќе го врати правилникот според кој максимално дозволеното ниво на афатоксините треба да биде до 0, 005, наместо 0, 05 како што одлучи владата неодамна, иако според Организацијата најдобро е воопшто да нема присуство на оваа опасна материја во млекото.