Незнам, прво да ја имаме понудата за зголемување на платите пред нас, однапред не може да кажеме на што ќе се согласиме. Треба прво членството да го прашаме, изјави Неделков за НоваТВ.
На третиот ден на штрајкот на вработените во образованието, претставниците на СОНК денеска во 15 часот ќе имаат средба во Министерството за образование и наука, со министерот Јетон Шаќири, дознава НоваТВ.
– Само што ми јавија дека во 15 часот е закажана средбата на СОНК со министерот Шаќири, ни изјави синдикалниот лидер, Јаким Неделков.
Тој не открива за кое покачување на платите ќе се согласи и на Владата ќе ѝ пружи рака за договор и за прекин на штрајкот во образованието, а по изјавата на министерот Шаќири дека „ќе пренамениме дел од буџетските средства на МОН за да ги зголемиме платите кои ги бара СОНК“.
– Незнам, прво да ја имаме понудата за зголемување на платите пред нас однапред не може да кажеме на што ќе се согласиме. Треба прво членството да го прашаме. Секој треба да има разбирање за тоа каква е ситуацијата во државата, дека е криза, но сепак како Влада треба да се организираат и да се дојде до договор за платите, изјави Неделков кој предмалку на Фејсбук објави:
– Нека денешниов ден, среда, биде среќен ден за сите нас. Да се надеваме дека денес ќе бидеме повикани на преговори и ќе ни биде дадена разумна понуда. Дотогаш, Среќно!“, напиша претседателот на СОНК, Неделков.
СОНК бара 18,4 отсто зголемување на платите на вработените во дејностите образование и детска заштита и тоа веднаш да бидат зголемени, согласно со порастот на минималната плата која од овој месец е 18.000 денари. И дополнително, таа плата да биде основица со која ќе се множат коефициентите на сложеност на работни места.
(Љ.Б.)