На денешната средба на премиерот Никола Груевски со генералниот директор на Директоратот за проширување на Европската Комисија (ЕК) Кристијан Даниелсон се разговараше за европската интеграција на Република Македонија, нејзините перспективи и реформите кои се преземаат за реализација на европската агенда, соопштува владата.
Според ова соопштение добро е оценет “континуираниот и добро воспоставен дијалог меѓу Република Македонија и Европската Комисија. Премиерот Груевски истакна дека европската интеграција е стратешка определба на земјата и дека приоритет на Владата останува да бидат реформите за европската интеграција при што референтен документ се избраните приоритети од Пристапниот дијалог на високо ниво и ангажманот за нивното исполнување во целина. Тој истакна дека ќе се продолжи и со активностите и реформите кои овозможуваат понатамошна модернизација и унапредување на економијата и општествените сфери”.
На разговорот станало збор за изборите и формирањето на новата влада. Груевски рекол дека “прелиминарните наоди на ОБСЕ се внимателно анализирани и штом се објават конечните наоди и препораки, ќе бидат земени предвид и адресирани, за што веќе се изработува акциски план за понатамошно унапредување на законодавството и неговата имплементација. Беше истакната интенцијата, потребата и корисноста од институционален дијалог и коректни и продуктивните политички дебати во рамките на институциите со инклузија на сите политички фактори, како и потребата од одговорно и посветено однесување на сите чинители”.
Груевски истакнал дека Македонија “останува посветена на зајакнувањето на добрососедските односи и интензивирање на дијалогот и надминување на отворените прашања во духот на европските вредности, како и подготвеноста и отвореноста за соработка со соседите во голем број области”.
Во соопштението не се наведува која била пораката која европскиот соговорник му ја пренел на премиерот. Според најавите, во посета на Македонија по изборите требаше да пристигне комесарот за проширување Штефан Филе но наместо него во Скопје допатува шефот на европскиот директорат за проширување.