Никола Попоски, министерот за надворешни работи, денеска престојуваше во работна посета на Бугарија, каде што оствари средба со бугарскиот колега Кристиан Вигенин.
Од МНР соопштуваат дека на средбата, двајцата министри се осврнале на актуелните билатерални прашања, состојбите во регионот и можностите за продлабочување и унапредување на односите, преку реализирање на конкретни договорни проекти што се од интерес на граѓаните на Македонија и Бугарија.
Акцент бил ставен и врз европската перспектива на регионот, која може да биде реалност само преку отворен дијалог и соработка, меѓусебно почитување и фокус на взаемниот интерес.
Министерот Попоски, потоа одржал средба со Комисијата за пријателство со Република Македонија на Собранието на Република Бугарија, на која се разговарало за продлабочување и унапредување на соработката меѓу двете држави на парламентарно ниво.
Во рамки на средбите реафирмирани се иницираните активности од сите области на соработка меѓу двете земји, особено Коридорот 8, по потпишувањето на Протоколот меѓу министрите за транспорт на двете држави, потоа отворање гранични премини и одржување на претстојниот Бизнис форум, наредната година во Република Македонија.
За време на посетата министерот Никола Попоски одржал предавање пред Дипломатската академија при Министерството за надворешни работи на Република Бугарија на тема: Пред и по пристапувањето, научени лекции и добрите практики за земјите кандидати за членство во ЕУ.