Министрите за надворешни работи на Русија и Украина, заедно со нивните колеги од Германија и Франција денес ќе се сретнат во Берлин.
Сергеј Лавров, Павло Климкин, Франк-Валтер Штајнмајер и Лоран Фабиус ќе разговараат за кризата на истокот на Украина. Киев и Москва дојдоа до договор за начинот како да се постапи при инспекцијата на хуманитарниот конвој додека Црвениот крст чека гаранција дека транспортот ќе биде безбеден од другата страна на границата. Киев призна дека хуманитарниот руски конвој е легален и се чека негово зелено светло за влез на оваа помош на теренот.
Около 300 руски камиони кои, според Русија, носат 1.800 тони хуманитарна помош се блокирани од четвртокот на 30 км од границата до Доњецк и се чека нивна инспекција.
Инаку повеќе детонации беа забележани во саботата на украинска страна од границата а според агенцијата АФП биле видени и десетици блиндирани руски возила. Москва го обвинува Киев дека сака да ја саботира хуманитарната акција и побара прекин на огнот за да може да ја достави помошта до населението.
Западните земји повикаа на преговори и побараа воздржаност во воени акции бидејќи бројот на жртвите постојано расте во Доњецк и Луганск кои се под опсада на украинската армија.
Украинскиот претседател Петро Порошенко во разговор со Ангела Меркел рече дека сака да учествува на следниот самит на ЕУ на 30 август за да ги информира Европјаните за ситуацијата. Тој разговараше и во американскиот потпретседател Џо Бајден и заклучија дека испраќањето на блиндирани руски возила и испорака на оружје до сепаратистите нема да ја подобри ситуацијата. Тие повикаа на дипломатско решение на кризата.
Москва демантира дека руски трупи и возила минале преку границата и го обвинија Киев дека фантазира. Но, премиерот на сепаратистите Александар Закхарченко во едно видео изјави дека добил 150 парчина воена опрема помеѓу кои 30 тенкови и други блиндирани возила и околу 1.200 војници кои биле тренирани на руска територија. Тој додаде дека тие стасуваат во критичниот момент.