Откако почна кампувањето на средношколците наспроти Министерството за образование, денеска тие ќе ја остварат и третата средба со министерот Адеми.
Учениците Александра Филипова, Дејан Рајковски и Огнен Ханџиски се претставниците на Средношколскиот пленум кои ќе одат на средбата, дознава НОВА.
Состанокот е закажан за во 11:30 часот а по вчерашната средба, средношколците велат дека се чувствува позитивна атмосфера за компромис кај надлежните.
Тие се надеваат дека на вчерашната седница министерот Адеми ги претставил нивните барања и очекуваат исходот од денешната средба да биде некакво конкретно решение.
Средношколците се спремни да отстапат од другите барања и да постигнат компормис за враќање на стариот концепт на државна матура и воведување на работна група во изготовка на екстерните тестови од технички и содржаен аспект.
Ова е трет ден средношколците да кампуваат во Паркот на новинари спроти зградата на МОН. Иако временските услови се непогодни тие велат остануваат 24 часа под отворено небо се’ додека не се постигне компромис околу нивните барања.
Истовремено, според статистиките на Пленумот, речиси 18.000 средношколци ја бојкотираат наставата во училиштата низ Македонија.
Скопските средношколци до завршување на часовите се присутни во училиштата но ја бојкотираат формалната настава, додека по завршувањето на смената се приклучуваат на кампот пред МОН.
Повеќе детали од денешната средба наскоро на НОВА.