Во 10 часот утре, средношколците ќе постават камп во Паркот на новинари спроти зградата на Министерството за образование и наука. Тие велат, четвртата недела од бојкотот ја продолжуваат и со 24-часовно присуство пред зградата, по што очекуваат дека министерот Абдулаким Адеми што поскоро ќе ги повика на разговор.
Од средношколскиот пленум на денешната прес-конференција пред МОН, соопштија дека бојкотот во училиштата продолжува, со тоа што учениците ќе ја бојкотираат наставата, а по завршувањето на часовите ќе се приклучат на кампот пред МОН.
Тие ги повикаа сите граѓани да дојдат и да им ја дадат потребната поддршка.
Исто така, средношколците посочија дека не се плашат од тоа што, законски, уште две недели бојкот може да значи бркање од училиштата и велат дека немаат намера да го прекинат ваквите активности се додека не се случи средбата.
До сега според статистиката на Пленумот, над 18.000 средношколци ја бојкотираат наставата ширум Македонија. Тие бараат средба со министерот Адеми, која тој им ја вети, а по која очекуваат да ги повлече измените во концептот за полагање државна матура.
Нивните барања се враќање на стариот концепт на полагање на државна матура. Законот за екстерното тестирање да биде ставен во мирување и електронското полагање на државна матура да се укине.