„Во изминатите два дена, значи од почетокот на откупот, се откупени 1.200.000 килограми тутун при што добиената просечна цена е 121 денар за килограм откупен тутун, изјави денеска Директорот на Државниот инспекторат за земјоделство, Румен Стаменов.
По реакцијата на струмичките тутунари кои се заканија со протест доколку вака продолжи проценката на тутунот и ваквиот однос на откупните фирми, Стаменов на средбата со новинарите истакна дека на почетокот од годинашниот откуп работите течат во рамките на законските прописи, а единствено неповолните временски услови, пред се големата влажност создава непотребна нервоза кај тутунопроизводителите.
„Од увидот во спецификациите во компаниите, се работи претежно за трета и четврта класа и многу малку во втора класа. Што значи дека на почетокот, производителите носат тутун од подолните берби. Во моментот се води една психолошка војна помеѓу тутунопроизводителите и откупувачите, да видиме кој ќе попушти прв. Ние како инспекторат строго ќе се залагаме да се почитуваат мерилата, мострите и правилата кои се пропишани со закон“ – рече Стаменов.
Тој апелираше до тутунопроизводителите и откупните компании да најдат заеднички јазик и ја надминат сегашната состојба со влажност на тутунот. Апелира до откупувачите да го испочитуваат договореното, односно да се откупува и со неколку проценти поголема влажност, со оглед дека тие имаат услови за вештачко сушење на тутунот.
Стаменов апелира и до политичките партии и поединци да не ја злоупотребуваат сегашната состојба и да не се повтори 2010 година, кога останаа неоткупени количини.
Што се однесува до инструментите за мерење на влагата на тутунот, Стаменов истакна дека тие редовно се проверуваат од 20 екипи со 40 инспектори кои се постојано на терен, Тој додаде дека за пријавување на неправилности е воспоставен и бесплатен телефонски број: 0800 11 000.