Лидерите на ЕУ на денешниот состанок во Брисел ќе се обидат да ја „запечатат“ балканската рута, да ја зголемат помошта за Грција и ќе се обидат да го убедат турскиот премиер да го забави приливот на бегалци и да прифати илјадници од оние кои не ги исполнуваат условите за добивање азил, се предвидува во нацрт соопштението.
Според наводите во него, лидерите на ЕУ ќе истакнат дека „нерегуларниот прилив на мигранти долж западнобалканската рута се ближи кон крај и дека таа рута сега е затворена“.
– ЕУ ќе биде заедно со Грција во овие тешки моменти и ќе направи се да и помогнеме во решавање на ситуацијата, се наведува во нацрт соопштението и притоа се додава дека тоа е „колективна одговорност на ЕУ која бара брза и ефикасна мобилизација“.
Ова соопштение ќе го разгледуваат 28-те лидери на земјите членки по состанокот со турскиот премиер Ахмет Давутоглу.
И австрискиот весник Стандард денеска објавува дека во Брисел се планираат драматични промени со цел решавање на мигрантската криза, меѓу кои е и затворање на балканската рута за мигранти.
На Самитот на шефовите на држави и влади на ЕУ ќе се планира и завршување на илегалната миграција и како приоритет ќе се постави запирањето на политиката на пропуштање од Грција до Германија, пишува виенскиот весник.
Врз основа на документот во кој како што наведува весникот имал увид, се предвидува дека Атина мора веднаш да направи место за 50.000 потенцијални баратели на азил како и тоа дека Грција ќе добие помош од ЕУ.
Мигрантите кои немаат шанса да добијат азил би требало во тој случај веднаш да бидат преместени во Турција, наведува весникот во интернет изданието.
Во написот што се темели на документот во кој весникот имал увид уште се наведува дека најдраматичната промена во политиката кон бегалците и мигрантите ќе биде донесена по средбата ЕУ-Турција во Брисел, со барањето за затворање на западнобалканската рута по
која досега минуваа тие.
Формулацијата според Стандард би била дека „нерегуларниот бран мигранти долж балканската рута се прекинува. Оваа рута е сега затворена“, која се наоѓа во изјавата што ќе биде усвоена на Самитот.
Многу од планираните мерки се базираат на договорите кои треба да бидат постигнати со Турција. Од Турција се очекува веднаш да биде конструктивна и да учествува во контрола на надворешната граница на Егејското море и да ги прифати оние мигранти кои не можат да добијат азил во Европа, во рамките на реадмисијата.
Притоа планиран и посебен договор за реадмисија меѓу ЕУ и Турција кој би стапил на сила на 1. јуни.
Пред тоа, на основа на билатерален договор треба да се делува од Грција. Исто така предвидено е и директно преселување на сириските бегалци од Турција во државите на ЕУ.
Во однос на ЕУ во изјавата се наведуваат неколку мерки кои треба да бидат применети во следните недели.
За да се спречат последиците од затворањето на балканската рута, односно натрупување на илјадници бегалци, ЕУ изразува подготвеност да направи се за да ја поддржи Грција во овој тежок момент.
Во документот се наведува дека се работи за колективна одговорност на Унијата која бара брза и ефикасна мобилизација на сите расположливи средства, но и придонес на земјите членки.
Итниот план на Европската комисија за хуманитарната помош ќе биде поддржан од шефовите на држави и влади на ЕУ, а за тоа се предвидени 700 милиони евра, од кои 300 милиони само оваа година.
Другиот дел се однесува до безбедноста, и предвидено е Фронтекс под итно да упати дополнителни службеници во Грција, на границата со Македонија и Албанија.
Исто така е предвидено да се обезбеди функционирање на првите прифатни центри каде што ќе бидат регистрирани бегалците и подготвувани за распоредување во државите на ЕУ.
Најдоцна до 1. април државите членки на ЕУ треба да ги стават на располагање службениците на Фронтекс, а Европол да ја засили борбата против криумчарите.
Во документот што го објавува Стандард се наведува дека договорот од Самитот треба да придонесе до крајот на годината сите земји да се вратат во Шенген, кога контролите на границите внатре во Шенген зоната треба да стане минато.