Струмичани се сеќаваат на Градскиот народен театар како на место во кое постоело компактност, другарство и колегијалност.
Театарот, кој броел 420 седишта, а секогаш се барало карта повеќе. За оние повозрасните, тоа е местото што ги одбележува педесеттите години од минатиот век на градот под Царевите кули.
„Градскиот народен театар на Струмица се градеше преку работни акции и колективи, самите работници после своето работно време одеа во театарот да работат. Првата одиграна претстава беше „Бегалка“ во далечната 1949 година, за до крајот на мојот театарски живот да изиграм над 190 претстави“, раскажува Ѓорги Шаламанов, присетувајќи се на времињата во кои постоело дружба на секој чекор.
Денес на тоа место во центарот на градот, после 13 години од неговата несреќна судбина во 2001 година кога беше опожарен, останаа само надворешни ѕидови. Тоа место во изминатите години е посетувано само во време кога се навестуваат избори.
Државниот врв неколку пати правеше фотосесии и сечеа ленти за негово повторно оживување. Овој месец повторно на неколку денови пред започнување на изборната кампања, премиерот Никола Груевски и министерката за култура Елизабета Канческа Милеска, на струмичките актери и јавноста им ветија дека почнува неговото раѓање.
Ветија дека овој простор повторно ќе го добие стариот лик и истиот ќе биде во функција за 18 месеци. Ветија, се фотографираа и заминаа со надеж за освојување на уште едни избори, а грдата слика остана во центарот на градот.
По ваквите ветувања, власта од Советот на општина Струмица обвини дека Груевски треба да даде неколку одговори за ветеното и како што изјавија, незаконско градење на стариот театар, за кое нема одобрение. Тие додаваат дека и овој пат се работи само за уште една од низата фотосесии на оваа власт во предизборен период.
Низата препукувања меѓу власта и опозицијата ќе продолжи и понатаму, а рушевината од стариот театар стои веќе 13 години.
Струмичките актери колеги на Шаламанов ќе се сеќаваат на убавите времиња, а новата актерска екипа од театарот „Антон Панов“, која годинава слави 65 години од своето постоење, ќе почека барем уште некоја година, со надеж дека некоја наредна претстава ќе ја одиграат во Градскиот народен театар на Струмица.