ВМРО ДПМНЕ ветува дека во наредниот период ќе се отворат најмалку 64.000 работни места. Носителот на ВМРО ДПМНЕ во „четворката“, Зоран Ставрески вели ,досега обзебедиле стимулативни мерки како ослободување од плаќање на работодавачот на социјални придонеси и персонален данок доколку вработи младо лице до 29 години, со обврска да биде задржано уште најмалку 12 месеци на работа.
– Македонија и понатаму ќе остане земја со најниски даноци во Европа, а реинвестираната добивка и понатаму нема да се оданочува. За домашните фирми се предвидени нови 100 милиони евра субвенционирани кредити со каматна стапка од само 5,5 отсто субвенционирана од буџетот. Ќе се обезбедат дополнителни 10 милиони евра, средства кои исто така ќе бидат наменети за домашните фирми кои се занимаваат со откуп и извоз на земјоделски производи, како и оние кои се занимаваат генерално со извоз од Република Македонија, рече Ставрески.
Тој додаде и дека во новата програма е предвидено и намалување на казните за домашните фирми, што би значело намалување на казните за малите субјекти, бидејќи истите ќе се одредуваат пропорционално како процент од вкупниот приход и големината на претпријатието.
Ставрески посочи дека програмата на ВМРО-ДПМНЕ содржи 2046 проекти, кои сите содржат конкретни рокови, финансиски средства, надлежни институции задолжени за нивна реализација.
Програмата на ВМРО ДПМНЕ, вели Ставрески, содржи низа мерки кои ќе помогнат за вработување на млади лица, преку отворањето на нови фабрики и одржувањето на најдобра бизнис клима во Југоистиочна Европа и одржувањето на најниски даноци.
Според него, прес-конференциите не се доволни за да се претстават сите проекти, но убеден е дека преку непосредниот пристап кој го оствариле со граѓаните, уживаат масовна поддршка, а работата на терен го докажало тоа.