Министерот за финансии, Зоран Ставрески го образложи предлог-буџетот за 2016 година пред пратениците на Собранието. Предвидено е државните институции догодина да потрошат рекордни 3,18 милијарди евра, собрани од даноци и задолжување.
Ставрески очекува следната година да има повисок степен на политичка стабилност, со што ќе се создаде подобра клима за стопанството и за реализација на инвестиците за граѓаните полесно да ги носат потрошувачките одлуки.
-Македонската економија во 2015 го продолжи трендот на раст кој во првото полугодие достигна 2, 9 проценти. Остварувањето во услови на сериозна политичка криза, каде економските субјекти беа под притисок на таа криза, а во исто време постоење на европска криза, претставува уште еден силен показател за жилавоста на економија и добро поставените економски политики. Со добрите економски политики, преку евтини кредити и проекти како и растот на странски инвестиции ќе овозможиме македонската економија да има солиден, добар раст, исто и со почетокот на работа на странските компании кои допрва доаѓаат, истакна вицепремиерот Ставрески.
Меѓу другото, за следната година, исплатата на социјалните трансфери ќе биде поголема за 5 проценти, за здравствена заштита – околу 25 милијарди денари, за патната инфраструктура, односно за Коридор 10, се планираат 2.579 милиони денари, a за втората фаза на националниот гасификационен систем, предвидени се 35 милиони евра.
Ставрески најави и ново зголемување на пензиите со исплатата на септември и октомври за 650 денари.
Според опозицијата, ова е историски највисок буџет за земја која има животен стандард како во Африка.
„Десет години буџетот го предлага ВМРО-ДПМНЕ но овој пат се надминавте со предлог – буџет од 3,5 милиони евра за 2016 година, се друго е исто. Од 2012 до 2015 буџетот, па и овој ќе видите исто: „ќе направиме“, „ќе изградиме“ и под тоа „ЌЕ“ вие имате најсиромашна земја во Европа и животен стандард како Африка.
Ова промашување е систематски и намерно за да може повеќе пари да потрошите и притоа што е најжално ова владејачко мнозинство ви ги одобрува сите овие промашени идеи. Не ви трепнува око за тоа што го правите во изминативе 10 години. Си играте мајтап со граѓаните само да си потрошите поголемо чоколадо кое граѓаните не можат да го платат.“ вели Марјанчо Николов од опозициската СДСМ.
Тој од пратеничката говорница му порача на министерот дека буџетот е расипнички, нереален и неразвоен.
„Основите на кој го планирате буџетот веќе во 2015 година се нарушени и самите гледате дека стапката на раст не се остварува оваа година, проектиравте 4 проценти, се намали на 3,5 проценти, сеа Народна банка и другите институции ви велат 3, 2 проценти. Зошто ви е потребно такво промашување на овие проекции? Буџетот на 2016 не е ништо друго туку буџет за нови долгови . Триста милиони евра владата планира да се задолжи, ако на ова се додадат и кредитите тоа се 500 милиони евра.
Јавниот долг е околу 50 проценти од БДП и тоа е реалност , ако продолжи ова ниво на задолжување РМ ќе не може да се справи со екстремна ситуација бидејќи владата ќе ја презадолжи РМ. Овој буџет не за развој туку обид за опстанок“, порача Николов.
Ставрески во реплика образложи дека никој не ја очекувал политичката криза и дека неговите излагање не се формулирање само во идно време, бидејќи до сега Македонија покажала економска стабилност и успеала да се справи со предизвиците.