Вицепремиерот и министер за финансии Зоран Ставревски денеска повторно не дојде на закажаното рочиште по предметот клевета каде тужител е ГЕМ (Граѓани за Европска Македонија). Неговиот адвокат го оправда отсуството на тужениот министер. Тој бил на службено патување надвор од државата заедно со премиерот.
Не е прв пат Ставревски да биде отсутен на судењето кои трае речиси две години, а за кое време тој ниту еднаш се нема појавено пред судот да даде исказ.
Тужителите, односно членови на движењето Граѓани за Европска Македонија (ГЕМ), Бранко Ѓероски, Никола Гелевски,Роберто Беличанец Владимир Милчин и Жарко Трајановски ја поднесоа тужбата за клевета против Ставревски во Јануари 2011 година. Ставревски јавно изјавил дека ГЕМ е дел од група организации кои се поврзани со аферата „Надеж“, а чија цел е загрозување на уставниот поредок на Република Македонија. ГЕМ негира било каква поврзаност со „Надеж“, а министерот доби пријава за клевета и навреда.