Груевски да не лаже дека ќе им се подмират долговите на стечајците, тоа веќе се е наплатено, а Јанкуловска да не ги охрабрува полицајците да не навредуваат, побара претседателката на УНИТ Лилјана Георгиевска, на денешните мирни протести на стечајците, поддржани од граѓанските здруженија „Ленка“ и „Солидарност“.
Георгиевска рече дека не верува во новите пакет мерки предложени во програмата на ВМРО-ДПМНЕ, бидејќи според неа се лаги и предизборен маркетинг, а за тоа го посочи фактот што само тројца работници од нејзиното Здружение од Куманово биле опфатени со новиот Закон за стечајци кој ги предложи власта.
>> ССМ се огласи со соопштение- ги штитиме правата на стечајците
Нејзините реакции доаѓаат откако групата од околу 200 стечајци денеска не беа примени од никој од раководството на МРТВ каде бараа да им се пролонгираат роковите за долговите на оваа ранлива категорија на граѓани, и по барањата кои ги доставија во Сојузот на синдикатите.
Бараат правен тим на ССМ, заедно со стечајците да донесат предлог-закон со што би се решиле нивните проблеми, како и задолжително присуство на правник при преговорите.
Во меѓувреме, лидерката на стечајците, Георгиевска, потврди дека преку Хелсиншкиот комитет ќе се разгледаат сите опции за поднесување пријава за клевета за полицискиот службеник кој ја обвини дека зема пари и ги иницира луѓето на протести.
>> Георгиевска вербално нападната од полицаецот кој ја обвини за поткуп
Денеска помеѓу учесниците во протестите, видлив беше револтот. Велат добиваат само ветувања, додека на врата „се борат“ со извршители.
Според професорот Здравко Савевски, ветувањата што владата ги нуди за после парламентарните избори, фрлаат сенка во политичката волја да се реши нивниот проблем.
– Владата можеше таква одлука да донесе пред еден месец, самото тоа што не ја донесуваат одлуката, и оставаат за после избори, фрла сомнеж дека ова е само предизборно ветување кое потоа ќе биде заборавено, вели за НОВА Савевски, надополнувајќи дека не верува во политичката волја на партијата на власт бидејќи законите кои таа ги донесува се директно исмејување на работниците стечајци.