Стевчо Јакимовски e ослободен од куќен притвор, откако судија на претходна постапка минатата недела му ја укинал мерката куќен притвор и му одреди мерки на претпазливост.
-Од надлежен јавен обвинител до судија на претходна постапка на 12. 09. 2019 година доставен е предлог за укинување на мерката куќен притвор и определување мерки за претпазливост. По разгледување и ценење на предлогот истиот е уважен од судија и мерката куќен притвор е укината, а определени се други поблаги мерки за претпазливост, соопштуваат од Судот.
Јакимовски беше во куќен притвор од 19 март годинава поради злоупотреби со легализација на градежни објекти и државно земјиште. Обвинителството за организиран криминал тогаш бараше притвор, но поради здравствени причини му е одредена поблага мерка односно куќен притвор.
Одделот за сузбивање криминал и корупција при МВР до ОЈО за гонење организиран криминал и корупција поднесе кривична пријава за злоупотреба на службената положба и овластување против поранешниот градоначалник на општина Карпош Стевчо Јакимовски и четворица вработени во општината кои во одделите за урбанизам. Поднесена е и кривична пријава за помагање против лицата сопствениците на фирмите ГРОМ дооел Скопје, на ЕМАГ дооел Скопје, ДОТ Мебел ДООЕЛ Скопје и физичкото лице ТК за кривично дело поттикнување во врска со злоуптреба на службената положба.
Според обезбедени документи во истрагата, тие иако знаеле дека не смеат, позитивно одговориле на поднесени барањата ГРОМ Промет, ЕМАГ, Дот Мебел и од физичкото лице Т.К за лгализација на времени објекти – бараки на улицата „Илинденска“ на градежно неизградено земјиште во сопственост на државата, иако објектите согласно законските одредби не смееле да бидат предмет на постапка за легализација на бесправно изградени објекти.
Со потпишување решение за утврдување на правен статус на времени објекти како да се бесправно изградени, на подносителите на барањата им овозможиле да ги запишат во јавните книги како легални објекти во нивна сопственост и со тоа им дале ексклузивно право да откупат земјиштето во сопственост на државата.
На ГРОМ промет, му овозможиле противзаконски да стекне имотна корист на градежно земјиште од 1.533 метри квадратни кое како неизградено земјиште во 2016 година имало вредност од 28 милиони денари 450.000 евра.
На ЕМАГ ДООЕЛ Скопје да стекне имотна корист со површина од 722 метри квадратни, кое во 2016 година вредело најмалку 13 милиони денари или 211.000 евра.
На фирмата ДОТ Мебел ДООЕЛ Скопје и на Т.К како физичко лице им е овозможено да се стекнат со ексклузивно право на откуп на државно земјиште под објект по 450 денари за квадрат, иако ако се одржало јавно наддавање, тоа би достигнало цена од 300 евра за квадрат.