Од утре, по два дена застој, операционите сали на Клиниката за ортопедија ќе бидат отворени и во нив ќе се оперираат пациенти, потврди за НОВА доктор Златко Темелковски раководител на клиниката. Тој рече дека со итна набавка стигнале неопходните лекови, антибиотици, анестетици, околу 900 инфузиони раствори и друг медицински потрошен материјал.
„ Од утре нема да има застој во работата. Пристигнаа тековните набавки кои доцнеа и сега имаме се што ни треба. Писмото кое го објавивте беше начин на поостра комуникација со менаџментот за да се забрзаат набавките“, изјави за НОВА Темелковски.
Тој рече дека ТОАРИЛУЦ претставува голема клиника која што опфаќа четири работни единици, а тоа значи дека е голем потрошувач на медицински материјали и лекови, особено во овие климатски услови кога фрекфенцијата на повредени со скршеници е многу зголемена. Набавките стигнаа откако НОВА објави дека се затворени операционите сали и се откажани сите операции на Клиниката за ортопедија. Лекарите велат дека последната нарачка била направена во ноември минатата година.
НОВА го објави и писмото со кое Темелковски вчера го известил менаџерскиот тим дека поради недостиг на лекови клиниката може да престане да функционира.
Сепак, на ортопедија се уште нема вештачки колена, колкови, протези, штрафови и се она што е потребно за да се оперираат пациенти. Темелковски вели дека како раководител нема влијание на тендерот кој се договара во Министерството за здравство.
НОВА уште во октомври минатата година објави дека на оваа клиника нема основни медицински материјали поради што се одлагаат операциите. Таму долго време се чека на медицински материјал кој е неопходен во текот на операциите. Лекарите од Стручниот колегиум уште тогаш тврдеа дека за повредните од сообраќајни незгоди клиниката позајмувала медицински материјали на реверс од веледрогериите.