Санитарната и здравствена инспекција од Битола констатирала дека нема неправилности во породувањето кај родилката Мери Стојаноска од Прилеп. Ова стои во извештајот кој Стојаноска го добила во саботата на о6 март, а пишува дека е направен на 26-ти февруари.
Стојаноска е револтирана бидејќи инспекциска контрола кај матичниот гинеколог била извршена на 03 март, денот кога НОВА започна да се распрашува за случајот, но во извештајот стои дека инспекторите таму биле пет дена порано. Таа вели дека целата постапка која ја водела инспекцијата отвара сомнеж, за тоа како е направен извештајот.
„Срамота е ова што се прави, немаат ли малку човечност во себе. Направиле извештај дека биле во контрола иако тоа не го направиле.. Не можам да разберам како ми праќаат ваков документ. Згора на се, не знам како можеле да го побијат резултатот од приватната болница каде што ми беше извршена хируршка интервенција и беа пронајдени заборавени парчиња од плацентата“, изјави Стојаноска за НОВА.
.jpg)
НОВА стапи во контакт и со приватната болница каде што била извршена интервенцијата на Стојаноска. Од таму не информираа дека контролата таму била направена на 26 февруари, истиот ден кога е направен извештајот.
Инспекторите од Битола се правдаат дека контролата била правена во повеќе наврати и во повеќе здравствени установи.
„Можеби побарале од ДСЗИ од Скопје да се прошири истрагата“, одговорија кратко од инспекторатот.
Од Државниот санитарен и здравствен инспекторат ги правдаат своите колеги, велат дека станува збор за технички пропуст со датумот во компјутерот.
„Направен е технички пропуст со датумот. Станува збор за технички превид, бидејќи решението од подрачната служба на ДСЗИ-Битола било изготвено и испратено на 09.03.2015-та година“, велат од ДСЗИ.
Но, Стојаноска објаснува дека писмото било пратено на 26 февруари, тој датум стоел во книгата во поштата каде што се потпишала кога го подигнала, на 06 март. На печатот, стои датум од 06 март кога писмото стигнало во прилепската пошта. Од каде во ДСЗИ го најдоа 09 март како датум на праќање на писмото, останува нејасно. Оваа некоординираност меѓу двете установи уште повеќе ја збунува Стојаноска која вели дека не може да му верува на вака изготвениот извештај.
„Убаво видов дека писмото е пратено на 26 февруари, таму каде што се потпишав. Како после ова да верувам на извештајот“, вели револтирано Стојаноска.
Понатаму, во одговорот од ДСЗИ стои дека тие својот дел од работата го завршиле, не се констатирани недостатоци од надлежност на инспекторатот
„ДСЗИ постапи во врска со претставка на М.С. од Прилеп (добиена на 9.02.2015) и за таа цел е извршен инспекциски надзор од инспектор од подрачна единица Битола во трите здравствени установи каде се водела бременост и извршено породувањето, како што се општа болница Прилеп, ПЗУ Специјална болница Плодност и кај матичниот гинеколог кој ја водел бременоста.
Од извршениот надзор не се констатирани недостатоци од надлежност на ДСЗИ. Но, согласно овластување на ДСЗИ, ќе биде инициран стручен надзор до Министерството за здравство и Лекарска комора на Македонија) во врска со укажаната здравствена услуга на пациентката, со оглед на крајниот исход (смрт на новороденче)“, се вели во одговорот од ДСЗИ.
Од инспекторатот објаснуваат дека со ова иницираат стручен надзор, Лекарската комора да формира комисија која ќе се изјасни дали има пропусти при породувањето. Од ДСЗИ велат дека наодот од обдукцијата кој се уште не е готов не спаѓа во доменот на нивната работа. Како понатаму ќе се одвива разврската на случајот останува на Министерството за здравство.
Мери Стојаноска се породи на 26 јануари во прилепската болница. Н а отпусната листа стои дека бебето е родено здраво со тежина од 4,200 грама, но на детската клиника во Скопје е однесено модро со недостаток на кислород, каде по четири дена починало. Стојаноска завршила со компликации, кога во ноќните часови со тешко крварење пет дена по породувањето била однесена во приватната болница Плодност, каде и била извршена уште една хируршка интервенција.