Генералниот секретар на НАТО, Јенс Столтенберг, кој вчеравечер пристигна во Македонија денеска ги започнува политичките средби.
Првата средба на Столтенберг е со министерот за надворешни работи Никола Димитров, по што оди во резиденцијата на претседателот Ѓорѓе Иванов, а во 10.30 часот ќе го посети Министерството за одбрана на средба со министерката Радмила Шеќеринска.
Ова ќе биде прва посета на еден генерален секретар на НАТО во просториите на ова министерство по една деценија.
Од Одбрана брифираат дека пред првиот човек на Алијансата имаат со што да се пофалат, односно пред него ќе ги претстават реформите, како што е покачувањето на буџетот за одбрана за 15 отсто од сегашниот и реформата на Владата за сукцесивно зголемување на буџетот од 2019 за 0.2 отсто за до 2024 година да стигне на 2 отсто од БДП.
Воедно од министерството дополнуваат дека пред Столтенберг ќе ја покажат нивната транспарентност, односите со другите држави и новиот дух на сегашната Влада, а од него очекуваат освен со посетата и преку изјава да ја потврди заложбата на Македонија на својот пат кон НАТО Алијансата.
Односно, Столтенберг треба да потврди дека секоја држава како што во моментов Македонија го прави тоа, која ги исполнува критериумите и стандардите, многу брзо би требало да се најде како полноправен член на НАТО.
По средбата со Шеќеринска, Јенс Столтенберг ќе се сретне со собранискиот спикер Талат Џафери, по што ќе следат одвоени средби во Законодавниот дом и со претседателот на ВМРО-ДПМНЕ, Христијан Мицкоски, па со лидерот на ДУИ, Али Ахмети.
Тој ќе се обрати пред пратениците во Собранието, каде е најавено присуство и на пратениците од опозицијата, кои долго време ја бојкотираат работата на Парламентот.
Во 15 часот, Генералниот секретар на НАТО ќе биде пречекан во Владата со највисоки државни и воени почести, по што ќе следи средба со премиерот Зоран Заев па заедничка прес-конференција на двајцата.
Од Владата велат дека самата посета на Столтенберг била знак дека Македонија е на прав пат, односно дека Брисел ја препознава новата атмосфера која владее во Македонија, притоа потенцирајќи дека засега спорот со името со јужниот сосед Грција, останува единственото отворено прашање кое треба да се надмине за да бидат отстранети пречките кон НАТО.
Претставници на Владата брифираат дека тие работеле на посетата на Столтенберг од јуни минатата година, а тој доаѓа по покана на премиерот Зоран Заев.
Во интервјуто за МИА, непосредно пред неговото пристигнување во Македонија, Столтенберг вели дека НАТО ќе ја покани Македонија да се приклучи како негова земја-членка откако ќе биде постигнато взамно прифатливо решение во спорот со Грција за името.
На прашањето дали Македонија ќе добие покана за членство на самитот во НАТО во Брисел и без решено име, под привремената референца ПЈРМ Столтенберг е дециден дека позицијата на Алијансата останува непроменета.
– Не. Позицијата на НАТО останува непроменета. Сите одлуки во НАТО се донесуваат врз основа на консензус меѓу сите НАТО сојузници. На самитот во Букурешт и на последователните самити, тие се согласија дека НАТО ќе ја покани вашата земја да се приклучи, откако ќе се постигне взаемно прифатливо решение за прашањето за името во рамките на ОН, вели Столтенберг во интервјуто за МИА.