Генералниот секретар на НАТО, Јенс Столтенберг денеска, за време на посетата на клучната воена база на Алијансата во Романија, повторно предупреди на „реален ризик од нов вооружен конфликт во Европа“.
Бројот на руски војници расте како што се скратуваат роковите за предупредување, рече Столтенберг во базата „Михаил Когалничан“, во југоисточниот дел на Романија, во време кога Западот ја обвинува Москва дека подготвува воен напад врз Украина.
Илјадници американски војници во текот на денот треба да пристигнат за да го зајакнат источното крило на Алијансата.
Столтенберг додаде дека се можни и други сценарија освен инвазија на Украина, наведувајќи за обиди за соборување на владата во Киев или хибридни сајбер напади.
Истовремено нема безбедност и затоа ние продолжуваме да ја повикуваме Русија на деескалација и на политички дијалог со НАТО, рече Столтенберг на заедничката прес-конференција со романскиот претседател Клаус Јоханис.
Укажувајќи на „загриженоста“ на НАТО, поради концентрацијата на војници и руската заканувачка реторика, тој го наведе единството на сојузниците и нивната решеност да реагираат.
Затоа е толку важно присуството на трупите на НАТО во Романија, рече Столтенберг, кој ја поздрави подготвеноста на Франција да учествува во идните тактички сили во Романија, земја која граничи со Украина.
Романскиот претседател ја осуди руската „стратегија на заплашување“.
„Поминуваме низ најтешката криза од падот на железната завеса“, изјави Јоханис.