Генералниот секретар на Алијансата, Јенс Столенберг, изјави дека пристапниот протокол за влезот на Македонија во НАТО ќе биде потпишан во скоро време, јави дописничката на МИА од Брисел.
-Ќе го потпишеме пристапниот протокол во НАТО и тоа можеме да го сториме набрзо. За ратификацијата ќе треба повеќе време, сѐ зависи од 29-те парламенти, рече Столтенберг за Политико Европа.
Можно е веќе во текот на оваа недела, амбасадорите на земјите членки на НАТО да го потпишат протоколот. Некои земји членки како Словенија веќе добија зелено светло за ова, како што изјави словенечкиот амбасадор Јелко Кацин.
-Штом ќе го потпишеме пристапниот протокол, Скопје ќе седне на масата, рече Столтенберг.
Тоа значи дека Македонија ќе учествува како земја набљудувач во сите клучни формати на состаноците на Алијансата, но полноправна членка ќе стане само откако сите 29 парламенти ќе го ратификуваат пристапниот протокол.
-Минатиот пат ни требаше околу една година, изјави шефот на Алијансата коментирајќи го зачленувањето на Црна Гора во 2017 година.
Кацин има слична прогноза, македонското знаме би се веело пред седиштето на Алијансата во Брисел до крајот на оваа година, најдоцна на почетокот на 2020 година.
Димитров: За недела до две Македонија добива столче во НАТО
И шефот на македонската дипломатија Никола Димитров денеска рече дека македонија оваа недела или на почетокот на идната ќе го потпише Протоколот за НАТО, а на столчето во Северноатлатнскиот совет ќе седне штом Протоколот биде ратификуван во грчкиот Парламент.
– Оваа недела или на почетокот на идната треба да се потпише Протоколот за НАТО. Потоа тој треба да се врати во грчкиот Парламент на ратификација. Се надевам дека потоа сите наши пријатели, а меѓу првите е Литванија, ќе го ратификуваат Протоколот во нивните собранија. Штом се ратификува во грчкиот Парламент ќе го добиеме столчето во Алијансата. И тогаш стапуваат во сила уставните измени и другите одредби од Преспанскиот договор, рече Димитров на трибината во МНР организирана од Инфо центарот за евроатлантски интеграции на која присуствуваше и министерот за надворешни работи на Литванија Линас Линкевичиус кој е во официјална посета на Македонија.
Тој истакна дека министерката за одбрана Радмила Шекеринска ќе присуствува по првпат на состанок на министрите за одбрана на 13 и 14 февруари во Брисел, а тој како министер за надворешни работи во април на Министерскиот состанок на НАТО во Вашингтон.
Инаку, право на глас Македонија ќе добие штом се потпише Вашингтонската повелба на НАТО.
Според процедурите, Преспанскиот договор треба да биде испратен во ОН каде треба да добие потврда од Советот за безбедност дека е решен спорот за името.