Осум истакнати технолошки компании, поттикнати од откритијата дека владата ги шпионира нивните клиенти и ги прибира нивните податоци се огласија со јавна кампања против владиното шпионирање со намера ја поправат штетата по нивната репутација. Гугл и Мајкрософт се предводници на кампањата чија цел е да се притисне претседателот Обама и Конгресот за да се постават нови граници во следењето на комуникациите од страна на владата.
Денеска Гугл и Мајкрософт заедно со Јаху, Епл, Фејсбук и Твитер во влијателните национални весници, меѓу кои и Њујорк Тајмс, го објавија својот план за регулирање на онлајн шпионажата и ја повикаа САД да поведе светска кампања за ограничување на можностите на владите во шпионирањето и следењето.
Ова е една ретка ситуација кога овие компании, често ривалски, зборуваат во еден глас со намера да извршат притисок врз владата. Американските експерти велат дека целата ситуација е далеку од наивна и безначајна ако се има во предвид дека директорите и основачите на овие компании често се барани како политички донатори и оттука, формираат моќна лоби група која се повеќе му покажува „мускули“ на Вашингтон.
“Во нивниот бизнис и економски интерес е да се заштити приватноста на нивните корисници и и агресивно да се инсистира на промени. Програмите на НСА за масовен надзор постојат од едноставна причина, а тоа е соработка со технолошките и телекомуникациските компании. Ако овие компании одбиваат да соработуваат, тогаш тие ќе бидат принудени да започнат значајни реформи во сферата на следењето”, вели Тревор Тим , активист на фондацијата „Електронска граница“.
Технолошките компании со ова отвораат трет фронт во битката против владиниот надзор, која ескалираше со неодамнешното обелоденување дека владата шпионирала без знаење на компаниите.
“Луѓето нема да користат технологијата во која немаат доверба. Владите е таа која ја стави довербата на ризик и владата треба да направи се за таа да се врати“, вели Бред Смит, генерален советник на Мајкрософт.
Извор: Њујорк Тајмс