Но транспарентност не е да се направи пи-ар објава, да се разлета дронот, и самиот да си каже што работи, туку да одговори на прашањата на народот. Не може за 100 дена да одржи само една прес-конференција, па и таа со повод. Не може само да се …
Анета Стојковска
Главното прашање е кому му беше наменет отчетот – на тие што го предложија или на тие што го избраа на местото каде што е сега? Дали костумосаните министри, пратеници, советници, вмровските градоначалници на другите општини, роднините и пријателите се вистинската публика за давање отчет?
Во државава каде што секој ден ни е ново изненадување, отчет за 100 дена работа на градоначалник стана свечен чин. Па, така, актуелниот прв човек на Скопје Орце Ѓорѓиевски изнајми сала во Филхармонија, водителка, пејачи… Се испеа химната, неколку патриотски песни и потоа градоначалникот си го исчита тоа со што сакаше да се пофали дека го сработил во изминатиот период откако го „презеде“ градот, им се заблагодари на тимот, на советниците и секако, како што е редот, на премиерот и – претставата заврши.
Колку пари се потрошија за овој многу свечен момент речиси сигурно нема да дознаеме, затоа што за градоначалникот веројатно тоа се прашања што не заслужуваат одговор во споредба со придобивките и расцутот што Скопје го доживува во последниве нешто повеќе од три месеци.
Главното прашање е кому му беше наменет отчетот? На тие што го предложија или на тие што го избраа на местото каде што е сега? Дали костумосаните министри, пратеници, советници, вмровските градоначалници на другите општини, роднините и пријателите се вистинската публика за давање отчет? За градоначалникот изгледа е така. Рака на срце, беа поканети и медиуми, но на еден ваков настан ним не им преостана ништо друго освен да ја гледаат претставата без можност да постават прашање.
Што ќе фалеше да се одржи еден обичен прес за 100-те дена како што тоа во минатото го правеа сите други градоначалници пред него? Пред сѐ, затоа што 100 дена не се 100 месеци или 100 години, како што самиот истакна деновиве. За толку кусо време можеа само да се започнат или да се продолжат или да се „откочат“ проектите со кои, како што милува да каже Ѓорѓиевски, ќе се врати достоинството на „неговиот“ народ, затоа што тој тоа го заслужува. Што од тоа ќе се заврши и ќе се реализира, ќе се знае по 1.340 дена, кога ќе му заврши мандатот.
На отчетот во Филхармонија го немаше токму народот, дури ни оние што на секоја објава на социјалните мрежи на Ѓорѓиевски му викаат „браво“ и „само напреТ градоначалнику“. Тие и онака се задоволни со она што тој им го соопштува на Фејсбук, а што според него е транспарентност.
Но транспарентност не е да се направи пи-ар објава, да се разлета дронот, и самиот да си каже што работи, туку да одговори на прашањата на народот. Не може за 100 дена да одржи само една прес-конференција, па и таа со повод. Не може само да се посочуваат проекти откако ќе започнат без присуство на медиуми, да се информира отпосле и колку што тој сака да каже. Ни збор повеќе ни збор помалку. Нема брифинзи, нема најави дека некаде ќе присуствува, само повремени изјави. Тоа ли е таа транспарентност што ја ветуваше и по која ќе се разликуваше од неговата претходничка? Па и Данела информираше само по Фејсбук.
Транспарентноста која всушност е комплетна затвореност кон јавноста (со исклучок на телевизиите оти сите градоначалници многу ги „сака“ камера) стана манир на работа на сите први луѓе на скопските општини. Оние на кои им поминаа стоте дена самите си се сликаа и си закачија објави на социјалните мрежи за тоа колку многу сработиле. Најмалку по три проекти дневно. Другите веројатно сè уште се мислат дали да тргнат по стапките на Орце или скромно да го одбележат овој јубилеј.
А, всушност, секој од нив треба сериозно да се фати за работа, наместо да се слика и снима и да се занимава со ПР-агенда. Изборите завршија пред три месеци, наредните се по речиси четири години. Има време за себепромоција, сега треба да се работи. И да им се одговара на граѓаните. Отчетно и транспарентно, ама не само на зборови. Да остават луѓето сами да забележат дека нешто подобро се прави од порано.
Патем, навистина ми е жал што не им се вклопија агендите на Ѓорѓиевски и на Мицкоски. Токму на големиот настан за 100-те дена, не присуствуваше премиерот. Тој даваше интервју, а на отчетот беше само неговата сопруга. Не ми е јасно како на Орце можело да му се случи ваков превид.
Текстот е сопственост на Слободен печат.мк