Франкофонските медиуми го забележуваат големото отсуство на гласачите-Албанци на претседателските избори кои се одржаа вчера. За 98,5 ФМ, „албанската заедница ги бокотираше изборите“.
Курие де Балкан, пишува дека на ВМРО-ДПМНЕ ќе му треба втор круг. Уште една нова победа за ВМРО-ДПМНЕ, чиј кандидат Ѓорге Иванов доби широка поддршка со 52% од гласовите, но поради слабиот одѕив потребен е втор круг, додава порталот.
Грчките медиумите претежно без коментар ги пренесуваат информациите за претседателските избори, потсетувајќи дека на 27 април ќе се одржи втор круг, заедно со предвремените парламентарни избори.
„Досегашниот претседател на Македонија како кандидат на владејачката партија ВМРО-ДПМНЕ, Ѓорге Иванов победи со голема разлика пред противниците на вчерашните претседателски избори, но за избор на нов претседател на земјата ќе треба и втор круг, кој ќе се одржи за две недели, на кој ривал на Иванов ќе му биде кандидатот на најголемата опозициска партија, СДСМ, Стево Пендаровски“, пишува „Катимерини“.
Српските медиуми пренесуваа конечни резултати од изборите.
Црногорска „Побједа“ пишува дека никој од кандидатите за претседател не успеа да освои најмалку половина гласови од вкупниот број на избирачи , па затоа ќе има и втор круг.
Европската комисија пак ќе го чека вториот круг од изборите за претседател на Република Македонија, како и оценката на ОБСЕ/ОДИХР, за официјално да го каже својот став за претседателските избори во нашата земја.