Стружани се жалат на неправилности во текот на целиот ден за време на претседателските избори. Наблудувач на политичка партија во избирачко место во Основното училиште „Браќа Миладоновци“ во Струга зборува за одредени проблеми.
„Цел ден се даваа списоци со имиња на лица кои до сега не се излезени на гласање и им се пренесуваат до партиските војници за да ги извадат луѓето на гласање. Исто така член на избирната комисија после маркирање на лицето со фломастер запишуваше име и презиме на човекот кој гласал. Тоа се случува во текот на целиот ден. Пред избирачкото место има автомобил со двајца тројца луѓе кои следат кои луѓе доаѓаат и излегуваат. Тоа се случува цел ден. Ова го ставивме и во записник, цел ден реагиравме но ништо не се презема“, рече еден од наблудувачите.
„Писмено до нас не се стигнати такви реакции. Но телефонски разговаравме со претставници на политички партии, тие се јавуваа и интервенираа. Ако се наоѓаат надвор од избирачкото место ние тие не можеме да ги тргниме“, вели Џенгис Хани претседател на ОИК во Струга
Албанците денес многу малку излегоа на гласање, и токму затоа излезноста до 17 часот беше само 21 %.