На десет отворени сцени со 28 настани е понудата за третиот по ред фестивал во кој ќе има ликовни колонии, вечери на поезијата, театарски претстави, филмови, афоризми, трка на келнери, угостителски бон – тон, како и три сцени со електтронска музика, џез и хип хоп, велат од организацијата на овој настан.
Главната забава ќе се заокружи со настапот на ѕвездите Кирил Џајковски, С.А.Р.С и Здравко Чолиќ кои ќе настапат на последните три дена од фестивалот. Но, како струмичани го доживуваат фестивалот? НОВА разговараше со граѓаните чии мислења се поделени за тоа колку и како овој фестивал допринесува за културата во градот.
„Гледајќи ја програмата имам чувство дека организаторите со овој фестивал се обидуваат за само неколку дена да ги надоместат сите работи и настани кои му недостасуваат на градот преку целата година. Има и убави идеи, но во најголем дел на „уметничката“ програма и недостасува квалитет. Што се однесува до трите главни вечери, каде до израз доаѓа суштината на фестивалот, добивам силен нагон да отидам во некој град далеку одовде, каде концертите, изложбите, театарските претстави и поетските вечери се главните артерии на градот, без кои не би можел да живее, и каде што наместо мирисот на скара би го почуствувал единствено мирисот на летото, вели струмичанецот Ване Костуранов.
Некои од неговите сограѓани, пак, сметаат дека одржувањето на ваков фестивал е „полн погодок“.
„Овие единаесет дена е вистинско уживање да се биде во Струмица, културни случувања за сите генерации. Би сакал овој фестивал да постои уште долги години и да стане вистински и препознатлив бренд и надвор од државата“, вели Марјан Трајков.
Оваа година единствената балканска ѕвезда е пејачот Здравко Чолиќ. Минатата година ѕвезда на фестивалот беше Северина, а пред неа Цеца Ражнатовиќ. НОВА испрати прашања до градоначалникот на општина Струмица зошто еден настан кој тие го опишуваат како „културна и уметничка манифестација“ во центарот на вниманието редовно ги има балканските ѕвезди, па дури и турбо фолк звездите од калибарот на Цеца и Северина. Од кабинетот на градоначалникот не го одговорија ова прашање. Единствено соопштија колку манифестацијата го чини буџетот на општината.
„Општина Струмица финансиски го поддржува фестивалот и неговите 28 настани со 2.700.000 денари, средства од буџетот и одобрени од Советот на општината, а другите средства се обезбедуваат од спонзори. Горди сме што и ова лето по трет пат, се реализира една многу убава и значајна културно – забавна манифестација, која веќе станува препознатлив белег и ја зацврстува позицијата на градот како културен центар во источна Македонија“, велат од кабинетот на градоначалникот Зоран Заев.
Од таму истакнаа дека фестивалот носи и економски придобивки за општината, пред се за угостителите и трговците.
Менаџерите на струмичките кафулиња велат дека цените на пијалоците и храната ќе останат исти како и во сезоната пред фестивалот.