Во првата „А“ зона цената за паркинг простор ќе изнесува 30 денари за еден час, додека во втората „Б“ зона цената ќе изнесува 20 денари. Паркираното возило во првата зона ќе може да биде паркирано најмногу два часа, додека во втората зона тоа ќе биде неограничено.
Граѓаните кои живеат и гравитираат во првата зона нема да плаќаат за паркирање на своите возила, а доколку имаат второ возило, за него ќе треба да плаќаат 300 денари месечно. За лицата со посебни потреби определени се 22 паркинг места и истите ќе ги користат бесплатно, а предвидени се и 28 паркинг места за такси возила, велат од Јавното претпријатие „Паркиралишта Струмица“.
Сопствениците на деловни објекти ќе можат да користат паркинг простор за најмногу три возила. За едно возило ќе плаќаат по 1.000 денари, за второто 2.000, додека за третото возило цената на паркинг местото ќе изнесува 3.000 денари. Плаќањето ќе се врши преку СМС порака и со греб картичка на повеќе локации. Вкупно ќе има 756 паркинг места.
„ Целта е да придонесеме организирање во сообраќајот и безбедност на учесниците. Пред да отпочне зонското паркирање, ќе има период на адаптација со цел да се информираат граѓаните на Струмица, а истиот нема да се наплатува“, вели Верица Узунова, директор на ЈП „Паркиралишта Струмица“.
За струмичани зонското паркирање ќе придонесе да се стави ред во сообраќајот. Дел од нив сметаат дека цените се реални и дека ќе се подобри сегашната состојба со хаосот во централното градско подрачје.
„ Ако имаат пари за бензин и за скапи автомобили, не треба да претставува проблем да платат и за паркинг простор“, вели Ване од Струмица.
„Јас сум возач на такси возило и сметам дека ќе се воспостави некаков ред. Нема да се паркираат кој каде стигне“, вели Илија Тодоров.
За учесниците во сообраќајот кои ќе ги узурпираат паркинг местата, а нема да извршат наплата, ќе следува казна од 100 денари, изјавија од Паркиралишта.
Зонското паркирање ќе почнува да се применува од средината на Октомври, а ќе се наплатува во работните денови од 07 до 21 часот, и во сабота од 07 до 17 часот. Во недела и за празници ќе биде бесплатно, велат од ЈП „Паркиралишта“.