Доколку не ги исплатат субвенциите за 2013 година до крајот на оваа година ќе организираме голем протест пред Владата, најавија денеска земјоделците од струмичкиот регион.
Собрани пред подрачната единица за земјоделство во Струмица со своите решенија, прашуваат зошто државата има два различни закони за исплата на субвенциите.
Претседателот на синдикатот на струмичките земјоделци Ристо Велков, вели дека се поминати пет месеци од последниот законски рок за исплата на субвенции за минатата година а земјодлеците сеуште не биле исплатени.
„Рековте дека исплатата ќе биде „календарска“ и тогаш кога парите им се најпотребни на земјоделците, но и тука не излажавте. Наместо календарска исплата – по календарот за потребите на земјоделците, направивте календарска исплата за потребите на власта за избори и за перфидно купување на гласови, рече Велков.
Тој праша кога ќе престанат надлежните да ги делат земјоделците и дали во Македонија постојат два различни вида на земјоделци.
Струмичките земјоделци се пожалија дека надлежните си ја префрлаат топката од еден на друг, а тие не можат да ги добијат паричните средства.
„Од месец мај два пати се јавувам до платежната агенција и овде и во Скопје, прво ми кажаа да чекам до крајот на јуни, но до денеска немам добиено никакви субвенции за тутунот. Не упатуваат од едно до друго место и секогаш велат да чекаме“, изјави Слободан Миланов од село Сушица.
„Од март имаме добиено четири решенија за добивање субвенции за кравјо млеко, но до денеска немаме добиено ништо за 2012 и 2013 година. Неколку пати се јавуваме, ни даваат број до Скопје, таму не можеме никој да добиеме. Кога одиме во нашата подрачна единица да прашуваме ни се смеаат и ни викаат да чекаме, вели Родна Радева.
Насобраните земјоделци порачаа дека оптималниот рок за засејување на пченицата и јачменот веќе одминува и дека не можат да ги набават неопходните семиња и ѓубрива.