На 22. и 23.ноември, во хотелот „Сириус” во Струмица се одржа Регионален Саем за прекугранична соработка – Струмица Експо. Целта на овој Саем беше да се иницира и да се зајакне деловната соработка меѓу претпријатијата од прекуграничниот регион Струмица – Кичево – Кукуш – Поликастро, како и да се допринесе за побрз економски развој преку обезбедување можности за вмрежување и соработка помеѓу малите и средни претпријатија.
На саемот своја изложбена презентација имаа околу 40 претпријатија од Кичево односно Кукуш и Полкастро од Грција од секторите на градежништво, прехранбена индустрија, земјоделство и други.
Во рамките на придружната програма на дводневниот Саем, покрај изложување на своите производи, неколку претпријатија се претставија со кратка презентација за своето работење и палетата на производи и услуги кои ги нудат. Исто така, неколку претпријатија имаа свои презентации на добри практики на тема општествена одговорност, како и страт-ап бизниси кои имаат добиено грантови од О. Струмица.
Организаторите на Струмица Експо спроведоа неколку настани од забавен карактер на кои присутните гости имаа можност да дегустираат вино со потекло од Грција и Македонија, кукушки леб, кичевско сирење и струмички ајвар.
Затворањето на саемот го одбележа доделувањето на признанијата за најдобра саемска презентација кои беа доделени на претпријатието „Престиж Декор”, Кичево и винаријата „Периклис Татсис”, Кукуш.
Саемот Струмица Експо беше организиран во рамки на проектот „Бизнис мрежа С-К-К” кој е финансиран од ЕУ.