По повод 31 март, Денот на правосудството, Судскиот совет организираше отворен ден за студенти од Правен факултет при Универзитетот на Југоисточна Европа, како и на ученици од Основното училиште „Наим Фрашери“ од Куманово.
Студентите од трета година од Правниот факултет во Тетово ги кажаа своите желби пред членовите на Судскиот совет дека се гледаат како идни судии и обвинители и дека се стремат да се запишат на Академијата за судии и јавни обвинители.
Студентите ја искористија можноста да прашаат за реформските процеси во судството, за документите кои Судскиот совет ги усвојува како дел од судските реформи, но интерес покажаа и за процедурата за избор, унапредување и разрешување на судии и претседатели на судови.
Членовите на Судскиот совет низ бројки и податоци ги информираа студентите за своите активности и надлежности, како и за низата активности кои се преземаат со цел да се обезбеди независно, објективно, одговорно и транспарентно судство.
Учениците од ОУ „Наим Фрашери“, иако се уште не се на возраст да се определат каде ќе го продолжат образовниот процес, сепак покажаа интерес како се одвиваат судењата во судница и каква е улогата на судиите, обвинителите и адвокатите во еден судски процес.
Од страна на членовите на Судскиот совет им беше пренесено дека во секој судска постапка, вклучително и во постапките кои советот ги води за судии иницирани од барања за нестручно и несовесно работење, неопходно е да се почитуваат законите и прописите за на крајот да се донесе објективна, издржана и независна одлука.