Од влезната врата излегуваше само чад, а внатре имаше многу деца кои бараа помош“, со овие зборови командирот на пожарникарите од Кочани, Драган Апостолов, ја опиша сцената што ја затекол во дискотеката „Пулс“. На денешното рочиште тој откри дека целата единица со девет возила била ангажирана во битката со пламените јазици.
Апостолов детално објасни како пожарникарите со „водени лепези“ се обидувале да ја намалат температурата за да можат да ги извлекуваат преживеаните до „црвениот тепих“, каде ги преземале екипите на брзата помош.
По пристигнување во 2:55 веднаш се упатив во објектот. Огнот беше распламтен внатре, гореше плафонот, шанкот и бината. Јас со млазот вода влегов внатре и правев лепеза од вода за да се намали температурата, да не не пеплоса огнот сите, додека останатите извлекуваа лица, појасни сведокот.
Командирот на територијалната противпожарна единица од Кочани, Драган Апостолов, денеска во судницата во Идризово даде потресен исказ за кобната ноќ во дискотеката „Пулс“. Тој појасни дека интервенцијата почнала во 2:55 часот, при што веднаш била побарана помош од соседните градови поради силината на огнот кој веќе ги зафатил плафонот, шанкот и бината.
Апостолов опиша дека гаснењето било исклучително тешко, а безбедносната опрема во самиот објект била нефункционална. Тој посочи дека и покрај заштитната опрема, и сам се здобил со изгореници поради екстремно високата температура.
Гаснењето беше многу отежнато. Пред тоалетот имаше сандаче хидрант, внатре имаше црево, но немаше вентил и не можевме да го користиме. Имаше и расфрлани употребени пп апарати од девет килограми“, изјави Апостолов пред судот.
Командирот рече дека најголемиот број починати и повредени биле пронајдени во тесниот ходник пред главната врата. По локализирањето на пожарот околу 4:30 часот, со дозвола на обвинител, биле извлечени уште три изгорени тела. Според неговото сведочење, кај задната врата на објектот немало настрадани лица, туку целиот метеж бил концентриран на главниот влез.