Судењето за “Трезор” – денеска почна од почеток, поради истекот на 90 дена од последното рочиште кое се одржа на 1 јули и кога беше сослушан сведок на обвинителството.
Претходното рочиште закажано пред три дена на 27 септември беше одложено поради отсуство на обвинетиот Мијалков кој имал здравствени проблеми. Неговиот адвокат Шврговски, во петокот до Судот достави медицинска документација за влошената здравствена состојба на обвинетиот и проблеми со желудникот.
Мијалков денеска беше во Судот и напомена дека освен во петокот бил редовен на сите останати судски рочишта.
Овој предмет го води Судијката Џенета Бектовиќ а застапници на обвинението се Артан Ајро и Трајче Пеливанов од СЈО кои сега постапуваат со овластување од Јавниот Обвинител.
Судењето за „Трезор“ почна во јуни минатата година по неколкумесечно месечно одолговлекување. Судијката Џенета Бектовиќ, четири месеци ја чекаше одлуката на Врховниот суд во Грција за екстрадиција на обвинетиот екс началник на Петтата управа во МВР, Горан Грујевски, за потоа да се одлучи да му се суди во отсуство.
Оттогаш на судските рочишта беа изнесени материјални докази од страна на обвинителите на СЈО од формирањето на фирмата „Финзи“ ДООЕЛ и трансакациите поврзани со неа, и беа сослушани и повеќе сведоци – вработени во УБК. За најмалку тројца сведоци – вработени во УБК, поради опасноста да споделат тајни и доверливи податоци, јавноста беше исклучена од судењата.
Обвинети во овој предмет се поранешниот директор на УБК Сашо Мијалков, поранешниот шеф на неговиот кабинет Тони Јакимовски, поранешниот помошник министер во МВР Небојша Стајковиќ и поранешниот началник на Петтата управа во МВР Горан Грујевски.
Според обвинението, обвинетите Мијалков, Јакимовски и Грујовски во 2010 година договориле набавка на опрема за пресретнување на комуникациите и обука за користење на опремата за потребите на Петтата управа. Но, наместо набавката да оди директно преку Министерството, обвинетите ја вклучиле и компанијата „Финзи“ како застапник на МВР.
На обвинетите им се суди за Злоупотреба на службената положба и овластување за набавка на електронско-комуникациска опрема за потребите на УБК со што го оштетиле Буџетот за 862.045 евра.
Следното рочиште за Трезор е закажано за 21 октомври.
Поради различни причини, најчесто поради промени во судечкиот совет од почеток започнаа и други случаи на СЈО :Поради промена на судечкиот совет во јануари минатата година од почеток почна судењето за „Траекторија“ во кој се обвинети Груевски, Пешевски, Јанакиевски. Поради истите причини – промена на судечкиот совет од почеток почна и судењето за „Транспортер“ во кој за злоупотреба на службената положба е обвинет екс битолскиот градоначалник и судењето за „Насилството во Центар“.