Повеќе од шест часа траеше судското рочиште за предметот „Ликвидација“ во кој помеѓу дел од обвинитетите е и новинарот Томислав Кежаровски. Во најголем дел од времето обвинителката Лиле Стефанова молчеше, односно до обвинителите кои ја изнесуваа својата одбрана пред судот најголем дел од прашањата ги поставуваше Судот, потоа одбраната, а Стефанова постави едно или две прашања.
На самиот почеток на судењето, адвокатите на одбраната посочија на, како што велат, еден од најапсурдните моменти во обвинието, бидејќи обвинителката Лиле Стефанова обвинителниот акт го подигнала по член од законот кој е избришан уште во Октомври 2011 со измените и дополнувањата на Кривичниот законик.
Адвокатите на одбраната ја упатија обвинителката да си ги „поднови“ информациите за настапените измени во судската библиотека. Исто така, побараа судот да се прогласи за ненадлежен за делото, бидејќи според нив, за да има дело за организиран криминал потребно е да има најмалку еден поттикнувач и тројца со-сторители, а во овој случај имало само двајца.
По кусите препирки помеѓу одбраната и судиите, судот истапи со одлука и ги одби барања на адвокатите. Судијката Дијана Груевска-Илиевска иако констатираше дека обвинието е покренато по неважечки член од закон, сепак оцени дека тие можат да постапуваат.
-Судот не е врзан со правната кфалификација, туки со описот на дејствијата, рече судијката.
Во текот на судењето одбраната реагираште уште на низа пропусти во процедурите. За време на одбраната на првообвинитетиот Илија Танев се појавија дополнителни нејаснотии откако ниту судот ниту обвинителката не знаеја да одговорат зошто е споменат одреден предмет во обвинението ниту пак имаа копија од него како доказ, за на крај сето да се сведе на тоа дека е настаната некоја грешка која ќе се допровери.
Танев реагираше на обвиниението каде се товари дека примал поткуп за да укине притвор на обвинети, квалификувајќи го како апсурден.
-За тој предмет кој се споменува во обвинението притворот никогаш не бил укинат. Како сум примал поткуп, а не сум го укинал притворот. Можете да проверите во судот, рече Танев во својата одбрана.
По неговата изјава следеше прашање од судијата „дали некогаш помислил да го укине притворот“, по кое настана смеа во судницата.
Едно од најемотивните сведочења беше она на новинарот Томислав Кежаровски. Неговата сопруга го слушаше Томислав внатре, а нивната ќерка чекаше вести надвор, бидејќи како малолетник не и беше дозволено да влезе во судницата за да го види татко си.
– Се соочувам со неразумниот каприц на правосудните органи, а јас само ја работев својата работа. Не е потребно човек да е правник за да примени здрав разум и логика и да ја сфати апсурдноста на обвинението против мене кое ми го наруши мирот и семејното спокојство, рече Кежаровски кој во неколку наврати не успеа да си ги сопре солзите.
Се пожали и на мерката притвор, иако судијата неколку пати го предупреди да не зборува за притворот бидејќи таа не била надлежна за тоа.
– Мерката притвор ќе ја окарактеризирам како крвничка. Секој ден доаѓаат луѓе во Шутка и по неколку дена ги пуштаат дома, но јас сум таму три месеци. Сега само што пуштија обвинет за убиство оти имал болки во увото. Се прашувам дали требаше да фатам пиштол во рака или нож или можеби да ја пљачкам државата за да добијам таков третман, рече новинарот.
На адвокатите на одбраната на два пати им беше забрането да му постават прашање на Кежаровски. Првото прашање гласеше „дали непосредно пред определувањето на притворот на Кежаровски му била упатена некаква непристојна понуда“, на што судијата експресно викна „се одбива, не може“. Потоа стана друг адвокат од одбраната и рече дека ќе го преформулира прашањето кое овојпат гласеше „дали сте примале закани во врска со овој случај“, на што судиите повторно нервозно одговорија дека овие и сите слични прашања не се одобруваат.
Неговиот адвокат Филип Медарски се пожали дека се уште не му бил одобрен увид во записникот, на што му се придружија и останатите адвокати кои тврдеа дека не им бил овозможен увид во сите докази. А обвинија и дека истражниот судија и обвинителката селектирано им ги дале материјалите од специјалните истражни мерки спроведени во 2009 година.
-Во многу наврати не се дадоа докази, не се даваа докази на увид, не ни се дадени ниту наредбите за посебни истражни мерки, односно следење на комуникациите за да видиме дали се спроведени законски, а еве само ќе ви кажам еден пример – најголем дел од спроведените мерки се снимки без аудио запис. Значи сама снимка кога двајца луѓе разговараат да се достави до судот како доказ без да има аудио запис за да се види содржината на разговорот дали е нешто противзаконски или не, тоа е апсурд, рече адвокатот Александар Тортевски.
Осумтемина се обвинети за неколку кривични дела, меѓу кои примање поткуп, злоупотреба на службената положба и на овластувањата, неовластено одавање информации и податоци за сведоците, соработниците на правдата, жртвите што се јавуваат во својство на сведоци и нивните блиски лица, противзаконско посредување и недозволено изработување, држење и тргување со оружје или распрскувачки материјали.
Судењето беше експресно закажано и тоа за време на судска ферија. Во судот и околу беше пусто, не работеше ниту бифето ниту продавницата, а немаше ни вода, поради што не работеа ниту тоалетите.
Фотографија: Нова Македонија