Својата оставка упатена до Собранието, судијата Наумовски ја образложил со „лични и професионални причини“, а по неа Судот останува со само седум судии, што го повлекува прашањето за идната ефикасност. Денеска мораше да биде одложено одлучувањето по предметот врзан за Изборниот законик и за платеното политичко рекламирање.
Уставен суд, од денеска, остана со само седум судии откако судијата Гоце Наумовски реши да се повлече од функцијата само пет месеци откако беше избран на оваа значајна функција. Во кусото образложение на својата оставка испратена до македонското Собрание, каде што беше избран на должност по предлогот на владиното мнозинство, Наумовски напишал дека „поднесува неотповиклива оставка од лични и професионални причини“. Оставката била изненадувачка за Уставниот суд, каде што денеска изутрина го очекувале Наумовски да присуствува на седницата на која требаше да се гласа по одредени предмети. Оттаму соопштија дека до Судот, од страна на судијата Гоце Наумовски не е доставена официјална информација дека поднесува оставка.
Судијата беше отсутен од седницата. Официјална потврда не е пристигната ниту од Собранието. Претседателот Дарко Костадиновски единствено доби потврда за оставката во телефонски разговор од претседателот на Собранието, Африм Гаши, изјавија денеска во Судот.